УИХ-ын гишүүн З.Нарантуяа Завхан аймагт ажиллах үеэрээ намрын чуулганы хугацаанд хэлэлцэн баталсан хууль тогтоомж, улс орны эдийн засаг, төсөв санхүүгийн өнөөгийн байдал, УИХ болон Засгийн газраас авч хэрэгжүүлж байгаа арга хэмжээний талаарх мэдээ мэдээллийг иргэдэд танилцуулж, сонирхсон асуултанд хариулт өгч, санал хүсэлтийг нь сонсч.
УИХ-ын гишүүнээс иргэд ихэвчлэн малчдын тэтгэврийн талаар болон хүүхдийн мөнгө, цалин тэтгэврийн нэмэгдэл, бензин шатахууны үнийн өсөлтийн талаар хамгийн ихээр сонирхож асууж байсан юм. Эдгээр асуултуудад тэрбээр дэлгэрэнгүй хариулж, зарим асуудлыг өөрийн “Нарантуяа сан”-гаас шийдэх, томоохон тулгамдсан асуудлыг УИХ, Засгийн газарт танилцуулахаа иргэдэд “амалсан” юм.
Энэ үеэр хоёрдугаар цэцэрлэгийн салбар цэцэрлэгийг хүлээлгэж өглөө. Тус цэцэрлэгийг хуучин Онцгой байдлын ерөнхий газрыг шинэчлэн засварласан бөгөөд Онцгой байдлын алба хаагчдын хүүхдүүдийг хүлээж авахаас гадна хөгжлийн бэрхшээлтэй хүүхдийг хүлээж авах юм байна. Энэ талаар Завхан аймгийн хөгжлийн бэрхшээлтэй хүүхэдтэй эцэг, эхчүүдийн холбооны тэргүүн Ж.Наранцацралт “Энэ цэцэрлэгт тархины саажилттай, хүнд хэлбэрийн тархины саажилттай, бие даах чадвар муутай хүүхдүүдэд зориулж “янзагахан” бүлэг нээсэн. Тус бүлэгт 0-6 насны найман хүүхэд хамрагдана. Уг нь хуульдаа зургаан хүүхэд гэж заасан юм билээ. Тус бүлгийн хажууд хүүхэд хөгжлийн төвийн “Янзагахан” ангийн хажууд нээе гэсэн санаачлагатай байна” гэв. Аймгийн хэмжээнд есөн цэцэрлэг байдаг ч хөгжлийн бэрхшээлтэй хүүхдүүд тэгш хамрагдаж чаддаггүй болохыг албаныхан хэлж байв.
Харин Завхан аймгийн Хөдөлмөр, халамжийн үйлчилгээний дарга Д.Гүрсэд “Энэ бүлэг нээгдвэл тухайн хүүхдийн эцэг, эх нь ажлын байртай болно. Энэ хүүхдүүдэд асрах сувилах ажил чухал. Цаашдаа хүүхдүүдийн орчин нөхцөлийг бүрдүүлэх арга хэмжээ авна. Хүүхдүүдийн тоног төхөөрөмжийг сайжруулах сургалтын тоног төхөөрөмжийн хангамжыг нэмэгдүүлнэ” гэлээ.
Р.Хишигжаргал
Сэтгэгдэл (1)