УИХ дахь эмэгтэй гишүүд “Монгол Улсын иргэдийн хорт хавдрын өвчлөлийн өнөөгийн нөхцөл байдлын талаар" Монгол Улсын Ерөнхий сайдад асуулга хүргүүллээ. Тодруулбал, Засгийн газрын 2016-2020 оны хөтөлбөрт “Хүн амыг өвчнөөс урьдчилан сэргийлэх мэдлэг, дадал, хандлагад төлөвшүүлж, нийгмийн эрүүл мэндэд чиглэсэн тусламж үйлчилгээг эрс сайжруулах, элэгний хорт хавдар хатуурлын нас баралтыг эрс бууруулах, элэгний С вирусийн голомтыг 2020 он гэхэд устгаж, халдварт тархалтыг таслан зогсоох “Элэг бүтэн Монгол” хөтөлбөрийг хэрэгжүүлэхээр заасан. Гэвч Монгол Улсын хүн амын нийт нас баралтын 25.6 хувийг хорт хавдрын шалтгаант нас баралт эзэлж, нас баралтын шалтгааны хоёрдугаарт орж байна.

Тухайлбал, элэг, ходооны хорт хавдрын өвчлөл нас баралтаар дэлхийд нэгдүгээрт, умайн хүзүүний хорт хавдрын өвчлөл, нас баралтаар Азид тэргүүлж байна. Тиймээс хавдрын өвчлөлийн өнөөгийн нөхцөл байдлын талаар цаашид сайжруулахад анхааран ажиллах үүднээс салбарын бодлогын хүрээнд авч хэрэгжүүлж байгаа арга хэмжээ, хорт хавдар илрүүлгийн цар хүрээг нэмэгдүүлэх асуудлаар, хорт хавдрын эмчилгээний чанар, хүчин чадал, хүртээмж, төсөв санхүү, хүний нөөцийн байдал зэргийн талаар УИХ-ын чуулганы нэгдсэн хуралдаанаар сонсгохыг хүсчээ.