УИХ-ын чуулганы өнөөдрийн хуралдаан 57.3 хувийн ирцтэйгээр эхэллээ. Хуралдааны эхэнд УИХ-ын дэд дарга М.Энх-Амгалан өнөөдрийн хуралдаанаар хэлэлцэх асуудлыг танилцуулах үеэр зарим гишүүд асуулт асуулаа. 

Гишүүн Х.Нямбаатар: Сонгуулийн тухай хуулийг хэлэлцүүлэхээр оруулж ирэх шаардлагатай байна. Учир нь нийслэлийн Баянзүрх дүүргийн хоёр тойрогт нөхөн сонгууль явуулах шаардлагатай болсон. Шат шатны сонгуулийг будлиангүй явуулах эрх зүйн орчныг бүрдүүлэх хэрэгтэй байна. Баянзүрх дүүрэг Засаг даргагүй байна. Үүнийг УИХ онцгой анхаарлаа хандуулах шаардлагатай. 

Гишүүн О.Баасанхүү: Сар шинэ болох гэж байна. Хэрүүл уруулгүй ажлаа хийе. Улс төрийг ёс жудагтай хийдэг баймаар байна. Цахим орчинд үнэн худал нь мэдэгдэхгүй маш их мэдээлэл гарч байна. Гүтгэх доромжлох асуудлаар эрх зүйн орчинг бүрдүүлэх хэрэгтэй. Эрдэнэт үйлдвэрийн 51 хувийн асуудлыг яримаар байна. Торгууль нь тэрбум тэрбумаар нэмэгдэж байгааг ойлгож байгаа биз дээ. Эрдэнэтийг бүхлээр нь битүүмжлэх талаар яригдаж эхэллээ. 

Гишүүн Б.Пүрэвдорж: Эрүүгийн хуулийн дагуу малын хулгай хийсэн хүн 10 хоног албадан хөдөлмөрлөхөд л хариуцлагаас мултрах боломжтой юм байна. Үүнээс үүдэн малын хулгайн гэмт хэрэг гаарлаа. Ялын бодлогыг чангаруулах шаардлагатай байгааг манай тойргийн өндөр настнууд тавьж байна. 

УИХ-ын гишүүн М.Билэгт:  Ашигт малтмалын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн Ашигт малтмалын тухай хуульд нэмэлт, өөрчлөлт оруулах тухай хуульд өөрчлөлт оруулах тухай хуулийн төслүүдийг хэлэлцэх асуудлаас хасмаар байна. Ер нь ашигт малтмалаар дамжаад Монгол Улсын тусгаар тогтнол аюулгүй байдалд аюул учирч байна. 

УИХ-ын дэд дарга Л.Энх-Амгалан: Дэгээр өнөөдрийн хэлэлцэх асуудалтай холбоотой асуудлаар асуулт асуух ёстой. Баянзүрх дүүргийн нөхөн сонгуультай холбоотой асуудлаар Төрийн байгуулалтын байнгын хороо анхааралдаа авах шаардлагатай байх. Удахгүй сонгуулийн хууль өргөн баригдана. Эрдэнэттэй холбоотой УИХ-ын гишүүн Я.Санжмятав гишүүнээр ахлуулсан ажлын хэсэг ажиллаж байна гэлээ.

Ингээд Ашигт малтмалын тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн Ашигт малтмалын тухай хуульд нэмэлт, өөрчлөлт оруулах тухай хуульд өөрчлөлт оруулах тухай хуулийн төслүүдийг хойшлуулах гишүүдийн саналаар горимын санал хурааснаар олонхын саналаар хэлэлцэх асуудлын жагсаалтаас хаслаа. 

Р.Хишигжаргал