УИХ-ын гишүүн Ж.Энхбаяраас цаг үеийн асуудлаар тодрууллаа.

-МАН-ын удирдах зөвлөл хуралдаж УИХ-ын гишүүн Л.Оюун-Эрдэнийг ЗГХЭГ-ын даргад томилсон байна. Энэ талаар та ямар байр суурьтай байна вэ?

-Л.Оюун-Эрдэнийг шинэ гишүүн болж орж ирснээс нь хойш дэмжиж байгаа. Улс төрийн томоохон тэмцлүүдийг толгойлж, олон түмэнд өөрийгөө таниулж чадсан улс төрч. Улс оронд шийдвэрлэх ёстой олон асуудал бий. Л.Оюун-Эрдэнэ эрх мэдэлд хүрч, ярьсан хэлснээ хэрэгжүүлж иргэдийнхээ хүлээлтэд хариу өгөх ийм бололцоог бид гаргаж өгөх ёстой. Тиймээс Засгийн газрын сайд, ЗГХЭГ-ын даргаар Л.Оюун-Эрдэнийг дэмжиж байна.

-Улс төрийн жагсаал цуглаан толгойлсных нь шагналд өгч байгаа юм уу, хариуцлага үүрүүлж байгаа юм уу?

-Мэдээж хариуцлага шүү дээ. Эрх мэдэл гэдэг чинь хариуцлага юм. Нийгэм маш олон зүйлийг хүлээж байна. Иймд Л.Оюун-Эрдэнэ гишүүн олон түмний хүлээлтэд хариу өгч, түргэн шуурхай хэлснээ хэрэгжүүлэх шаардлагатай байна. Үүнийг иргэд ч хүсч байна. Бид ч бүхий л талаас дэмжлэг үзүүлж ажиллах болно.

-ЗГХЭГ-ын даргад өөр хүн өрсөлдсөн үү?

-Ерөнхий сайдын зүгээс оруулж ирсэн. Өөр хүн өрсөлдөөгүй.

-Энэ талаар хэзээ хэлэлцэх юм бол?

-Одоо уг асуудлаар Ерөнхийлөгчид өргөн барьж, зөвшилцөх учиртай. Мөн Авлигатай тэмцэх газраас тодорхой бичиг ирэх ёстой. Үүний дараа Төрийн байгуулалтын байнгын хороо хуралдаж, чуулганаар оруулна. Ерөнхийдөө маргаашийн дотор багтаж шийдвэрлэхээр ажиллаж байна.

-Өнөөдөр УИХ-ын шинэ дарга томилогдлоо. Гэтэл нэгдсэн чуулган завсарлах дөхөж байна. Үүнтэй холбогдуулан чуулган сунгах эсэх асуудал яригдаж байна?

-Чуулган хуульд заасны дагуу энэ бямба гаригт хуралдаад завсарлах нь зөв гэсэн саналтай байна.

Б.Лхам