"Улс төрийн тогтолцоо хямран доройтож, үндэстний ёс суртахуун, нийтлэг үнэт зүйлс алдагдаж байгаа хүнд хэцүү үе тохиож байна. Хууль тогтоох дээд байгууллагыг төрийн мафижсан бүтэц бүрэлдэхүүнээс чөлөөлөх алхмыг хийх чухал цаг үе ирээд байна. Намуудын нэр хүнд шалан дээр унасан энэ үед олон түмний сүүлчийн итгэл “ШУДАРГА БИЕ ДААГЧ” нар дээр тулгуурлаж байгааг сүүлийн үеийн социологийн судалгаа харуулж байна.
Ийм учраас “БИЕ ДААН НЭР ДЭВШИГЧДИЙН ХОЛБОО” нэрийн доор Монголын төр, нийгмийн зүтгэлтнүүд нэгдэж УИХ-ын сонгуульд нэр дэвших хүмүүсийг тодруулах Электорат хөдөлгөөнийг байгуулах шийдэлд хүрлээ. Өнөөдөр энэхүү хөдөлгөөн байгуулагдсаныг олон нийтэд албан ёсоор зарлаж, хамтын тунхаг бичигт гарын үсэг зурж байна.
Энэхүү хөдөлгөөн нь УИХ-ын сонгуульд нэр дэвшүүлэх субъект биш. Юуны өмнө 2020 оны УИХ-ын сонгуулийн 76 тойрогт өрсөлдөх бие даан нэр дэвшиж болохуйц хүмүүсийг олон түмнээр бүтэн жилийн турш хэлэлцүүлэх зорилготой юм. Улмаар бие даан нэр дэвшигчдийн дундаас олон түмний шалгуурт нийцсэн хэсгийг шалгаруулан дэмжих үүргийг Электорат хөдөлгөөн хүлээх болно" хэмээн төр засаг, урлаг, аюулгүй байдал, гадаад бодлого, батлан хамгаалах, эдийн засгийн салбарт зүтгэж байсан эрхмүүд ярилаа.
Тэдний онцолсноор "Электорат хөдөлгөөн"-ийг байгуулжээ. Уг хөдөлгөөний гишүүд нь, олон нийтэд танигдсан, нийгэм-улс төрийн талаар ойлголттой, олны итгэлийг хүлээсэн хүмүүс төдийгүй өөрсдөө сонгуульд нэр дэвшихгүй гэсэн үзэл бодолтой хэсгийн төлөөлөл аж. Хөдөлгөөнийг байгуулсны зорилго нь тодорхой тооны бие даан нэр дэвшигчдийн ард олон түмний итгэл найдварыг хүлээсэн хүмүүсийн сайн дурын эвсэл байх аж.
Нэг үгээр шударга бие даагчдыг олон нийттэй хамтран гаргаж ирснээр Монголын Улс төрийн хямралыг даван туулах нэгэн боломж нээгдэнэ гэж тэд үзэж байгаа ажээ.
Тэдэнтэй холбогдохыг хүсвэл
- Цахим сайт: www.electorate.mn
- Твиттер хаяг: @MnElectorate
- Фэйсбүүк хаяг: www.facebook.com/electorate.mn
- Цахим шуудан: electorate@gmail.com хаягаар тус тус холбогдож болох аж.
