Сүмогийн их аварга Асашёорюү Д.Дагвадорж “АСА” циркийн байранд их засвар хийнэ хэмээн мэдэгджээ. Энэ тухайгаа тэрбээр “Энэ зун циркд их засвар хийнэ. Аргагүй, 10 жил засвар хийгээгүй юм. Тав тухтай орчин бүрдүүлнэ гэдэг итгэлтэй байна. Та бүхнээсээ хүлцэл өчиж байна. Баярлалаа" гэжээ.

АН-ын нарийн бичгийн дарга О.Магнай ШӨХТГ-ын даргаар ажиллаж байхдаа “Төрийн өмчийн хороо, тухайн үеийн БСШУЯам, “АСА консалтинг” компанийн хооронд 2008 оны долдугаар сарын 17-ны өдөр байгуулсан Улсын циркийг худалдах, худалдан авах гэрээний нөхцлийг биелүүлээгүй. Төрийн болон орон нутгийн өмчийн тухай хуулийн 65.1 дүгээр зүйлийн 4 дэх хэсэгт заасныг тус тус зөрчиж, циркийн урлагийн ажилчдын гэрээ болон хууль тогтоомжид заасан үйлчилгээг хэрэглэгчид хүргэхгүй байгаа нь Хэрэглэгчийн эрхийг хамгаалах тухай хуулийн 5 дугаар зүйлийн нэг дэх хэсэг,  Өрсөлдөөний хуулийн 12 дугаар зүйлийн 12.1.10 дахь заалтыг тус тус зөрчсөн гэж үзэх үндэслэлтэй байна.Өнөөдөр зөрчлөө арилгах албан шаардлага хүргүүлээд байна. Зөрчил дутагдлаа 2015 оны нэгдүгээр сар гэхэд арилгаагүй тохиолдол циркийн хувьчлалыг цуцлах хүртэл арга хэмжээ авахаар холбогдох байгууллагуудад хандана. Анх 2008 оны долдугаар сарын 17-ны өдөр ТӨХ улсын циркийг үйл ажиллагааг нь өөрчлөхгүй, зориулалтын дагуу явуулах болзолтойгоор дээрх компанид хувьчилсан байдаг. Хувьчлахаас өмнө 65666 м2 эзэмшил газартай, 136 ажилчин, 4823 м2 барилга байгууламж болон 41 мал, амьтантай байжээ. Саяын шалгалтаар 24269 м2 эзэмшил газар, 61 ажилтантай болон буурч, мал амьтан огт байхгүй болсон байна” хэмээн мэдэгдэж байсан удаатай.

Үүнд нь Асашёорюү Д.Дагвадорж “ШӨХТГ-аас гаргасан мэдэгдлүүд, цагааныг хараар будсан явцуу үйл ажиллагаа хэрээс хэтэрч байгааг хэлэхийг хүсч байна. Энэ газраас манайд явуулсан бичиг баримттай танилцсан. Энэ бичигтээ бодит байдалд үл нийцэх тоо баримт ихээр гаргаж, мэдээллийн хэрэгслээр хар мэдээлэл цацаж байна. Энэ мэдээллүүдийг зүгээр хараад сууж чадахгүй нь. Бас дээрээс нь өгсөн албан бичиг нь дотроо сар өдөр нь буруу. ШӨХТГ-аас мэдээлэл хийсний дараахан ч гэсэн “Галын домог” гээд тоглолт явагдсан. Гэтэл хэвлэл мэдээллийнхэн хэн нь ч ирээгүй. Өнөөдөр монголчууд цирк үзэхээ больчихсон. Яамдын сайд, дарга нарт бүгдэд нь урилга өгч байгаа. Хэн ч ирдэггүй. Сайдууд ажилтай байж болно. Дэд сайд, төрийн нарийн бичгийн дарга нар уг нь ирээд үзэхэд болно шүү дээ. Харин гаднын байгууллага, Элчин сайдын яамдын төлөөлөл биднийг хүндлээд ирж үздэг” гэсэн хариу өгч байв.

С.Сүлд