“Капитал" банкийг татан буулгахаар болсноо Монголбанкнаас мэдэгдсэн. Тэгвэл банк татан буугдах шалтгаан нь харилцагчдынхаа мөнгийг олгож чадахгүй байдалд хүрснээр ийм шийдвэр гаргадаг юм байна. Энэ талаар УИХ-ын гишүүн Б.Ундармаа “Би “Капитал” банканд ямар ч хувьцаа эзэмшдэггүй. Ийм шийдвэр гарсан нь улс төрийн нөхцөл байдал орсон гэж бодож байна. Үүнээс өөр тайлбар хийх боломжгүй” гэсэн юм.

Тэгвэл УИХ-ын гишүүн тэрбээр “Капитал” банкнаас ямар ч хувьцаа эзэмшдэггүй гэдэг нь үнэн үү. Энэ асуултад хариулт эрэхээс урьтаж, АТГ-д хэдий хэр хэмжээний орлоготой гэж мэдүүлж байсныг сонирхоё.

Тэрбээр 2015 онд өөрийн орлого 1 тэрбум 15 сая төгрөг, гэр бүлийн орлого 1 тэрбум 224 сая төгрөг буюу нийлээд гэр бүлээрээ нийлээд жилд 2 тэрбум 300 орчим сая төгрөгийн орлоготой гэж мэдүүлж байжээ.

Гэтэл УИХ-ын гишүүн болохын зэрэгцээд энэ орлого нь салхинд хийссэн мэт алга болсон байх юм. Өөрөөр хэлбэл, 2016 онд өөрийн орлого нь 20.3 сая, гэр бүлийн орлого нь 60 сая төгрөг болтлоо буурсан гэж мэдүүлснээс харвал түүний жилийн орлого 60 дахин буурчээ.

Улмаар 2017 онд өөрийн орлого нь 24.4 сая болж бага зэрэг өссөн бол гэр бүлийн орлого нь 36 сая болж бүр буурсан байх юм. Харин 2018 онд өөрийн орлогоо 24.4 сая төгрөг гэсэн бол гэр бүлийн орлого нь 33.6 сая мэдүүлсэн байна.

Түүний орлого болон гэр бүлийн орлого ийнхүү жил бүр буурсан үзүүлэлттэй байна. Тэгвэл УИХ-ын гишүүн тэрбээр “Капитал” банканд хувьцаа эзэмшдэггүй гэж хэлсэн нь үнэн үү гэдэг асуултын хариултыг одоо хайя. АТГ-д 2015-2018 онд мэдүүлсэн хөрөнгө орлогын мэдүүлэгтээ тэрбээр тус банкны 99.98 хувийг дангаар эзэмшдэг гэж мэдүүлжээ. Тодруулбал,

2015-2017 онд

Бишрэлт холдинг, Бишрэлт пропертиз, Бишрэлт трейд, Бишрэлт, КАПИТАЛ БАНК, Монгол эм импекс концерн, Веллмарт, Бишрэлт интернэшнл, Бишрэлт инженеринг энд консракшн, Бишрэлт индастриэл, Монгол мах экспо, Сүлд секьютири, Бишрэлт секьюритис, Монгол цемент, Ривер бийч, Хонд өргөө, Капиталмаркет корпораци ҮЦК, Капитал премиум ББСБ, Чингис хаан даатгал, Монгол милл, Соёмбо даатгал, Өмнөговь эм хангамж, Бишрэлт косметикс энд фейшн, Зоос гоёл, Эрдэнэс таван толгой ХК зэрэг компаниудын 95-100 хувь эзэмшдэг гэж мэдүүлсэн байх юм. Эдгээр компанийг 2017 он хүртэл эзэмшдэг гэж мэдүүлсэн бол

2018 онд

Зоол гоёл, Эрдэнэс таван толгой ХК, Бишрэлт косметикс энд фейшн, Соёмбо даатгал, Капиталмаркет корпораци ҮЦК, КАПИТАЛ БАНК, Бишрэлт холдинг, Нью даниста рөүд энд констракшн, Эрдэнэзам зэрэг компанийн 95-100 хувийг эзэмшдэг гэж мөн л мэдүүлсэн байх юм. Өөрөөр хэлбэл, АТГ-ын хөрөнгө орлогын мэдүүлэгт бүртгэснээр тэрбээр КАПИТАЛ БАНКНЫ 99.97 хувийг дангаар эзэмшдэг болох нь эндээс харагдах биз ээ.

Энд нэг зүйлийг онцлоход, тэрбээр 9.18 га газар эзэмшдэг бол өмчлөлийн 750 мк газартай юм байна. Энэ нь мөнгөн дүнгээрээ 1 тэрбум 235 сая 784 мянган төгрөгийн ханштай аж. Мөн 1 тэрбум 365 сая төгрөгийн орон сууц, барилга байгууламжтай бол 150 сая төгрөгийн үнэтэй Mercedes Benz-S500 загварын автомашинтай юм байна.

Эндээс үзвэл, УИХ-ын гишүүн Б.Ундармаа нь “Капитал” банкны хувьцаа эзэмшигч биш гэдэг нь худал бололтой.

Ташрамд дурдахад, “Капитал” банкны гүйцэтгэх захирлаар түүний нөхөр А.Ариунболд ажилладаг юм байна.

Өнгөрсөн 2018 оны арванхоёрдугаар сард АТГ-аас тус банкны гүйцэтгэх захирал А.Ариунболдын өрөөнд нэгжлэг хийсэн мэдээлэл цацагдаж байсан. Учир нь жилийн долоон хувийн хүүтэй, 48 тэрбум төгрөгийн зээлийг ЖДҮХ сангаас  авсан баримт олон нийтэд хүрсэн. Энэ мөнгийг УИХ-ын гишүүн Б.Ундармаа өөрийн “Капитал” банкаараа дамжуулан “мөнгө угаасан” хэрэгт холбогдсонтой холбоотой ийн нэгжлэг хийсэн гэх.

ЖДҮХС-аас түүний эзэмшлийн буюу хамаарал бүхий банк нь зээл авч, зориулалтын бусаар зарцуулсан байхад Б.Ундармаа гишүүн “Би энэ талаар мэдээгүй” гэж мэдэн будилсан. Тэгвэл тэрбээр өнөөдөр дахин мэлзэж, тус банкнаас хувьцаа эзэмшдэггүй гэж мэдэгдлээ.

УИХ-ын гишүүн Б.Ундармаагийн энэ олон мэдэн будилтын аль нь үнэн юм бэ.

Г.Нацаг-Эрдэнэ