УИХ-ын О.Баасанхүү Хууль зүйн байнгын хорооны хуралдааны үеэр өөрийг нь тагнаж, чанасан тухайг ярьсан юм. Тэгвэл түүний эл үйлдлийнх нь хариуд Хууль зүй, дотоод хэргийн сайд Ц.Нямдорж хариу өгсөн байна. Уг хариуд "УИХ-ын Хууль зүйн байнгын хорооны хуралдааны үеэр хэлсэн үгтэй тань холбогдуулан дараах тайлбарыг хүргэж байна. Үүнд,
1. С.Зоригийн амь насанд халдсан хэрэгт холбогдуулан иргэн Г.Батсүхийг гадаадаас баривчлан ирэх ажиллагаа 1999 оны 4 сард буюу Ж.Наранцацралт Ерөнхий сайд байх үед хийгдсэн. Үүнээс хойш 1.4 жилийн дараа миний бие 2000 оны наймдугаар саод Хууль, зүй дотоод хэргийн сайдаар томилогдсон.
2. Иргэн Д.Энхбатыг 2003 онд Францаас хүч хэрэглэн баривчилж, 4 улс дамжуулан, Монгол Улсад авчрах ажиллагааг Тагнуулын Ерөнхий газрын ажилтан Б.Хурц тэргүүтэй хүмүүс гүйцэтгэж, уг асуудлыг тухайн үеийн ТЕГ нууцын журмаар шалгасан, ХЗДХ-ын сайд болон ЦЕГ уг ажиллагаанд оролцоогүй болно.
Б.Хурц уг хэрэгт холбогдуулан Англи, Герман улсад удаан хугацаагаар хоригдож байсныг хүн бүр мэднэ.
Хуулиар ТЕГ нь Ерөнхий сайдад шууд харъяалагддаг бөгөөд тэнд явагдаж байгаа аливаа ажиллагааг ХЗДХ болон сайд мэдэх, удирдах, чиглэл өгөх, ажиллагааных нь явцад хяналт тавих хууль зүйн бололцоо байхгүй, эрүүгийн хэрэгт хяналт тавих ажлыг прокурорын байгууллага гүйцэтгэдэг.
3. Та 2019 оны гуравдугаар сарын 14-нд Эрдэнэт хотод Жи Тайм сүлжээний хохирогч нартай уулзах уулзалтын болон олон нийтийн аюулгүй байдлыг хангахын тулд цагдаагийн нэр бүхий хоёр ажилтан уулзалтыг ажиглаад гарсан, тэр үед өөрийн тань туслах, хуучны танил Баттогтохтой тааралдаж, хэзээ явах, хамт хоолонд орох талаар ярилцаад явсан байна.
Өөрөөр хэлбэл, өөрийг тань чагнах, тагнах ямар ч ажиллагаа явагдаагүй, тийм шаардлага ч байхгүй гэдгийг хариуцлагатайгаар мэдэгдэе гэжээ.
Тэгвэл дээрх асуудалтай холбогдуулан ЦЕГ-аас мөн тайлбар хийсэн юм. Уг тайлбарт 2019 оны гуравдугаар сарын 14-ний өдөр тойргийнхоо сонгогчидтой уулзсан. Цагдаагийн байгууллага уулзалт хийж байгаа орчинд эргүүл гаргаж ажилласан. Тухайн үед цагдаагийн албан хаагч эргүүл хийж яваад танилтайгаа тааралдаж, энгийн яриа өрнүүлээд салсан байдаг. Тэр танил нь О.Баасанхүү гишүүний зөвлөх нь учраас энэ талаар УИХ-ын О.Баасанхүүд дуулгажээ. Тиймээс О.Баасанхүү гишүүн гомдол гаргасан. Бид шалгаж үзэхэд, О.Баасанхүү гишүүнийг цагдаагийн байгууллага тагнаж чагнаагүй гэдэг нь батлагдсан. Бид энэ талаараа албан бичиг хүргүүлсэн" гэсэн юм.
Г.Нацаг
Сэтгэгдэл (22)