УИХ-ын гишүүн О.Баасанхүү өөрийн цахим хуудсаараа дамжуулж, ээлжит байр сууриа илэрхийллээ. Тэрбээр “Ипотикийн зээлийн эргэн төлөлтөөр улсад 3.5 их наяд төгрөг төвлөрсөн. Энэ мөнгийг ипотекийн зээлд буцааж оруулах замаар орон сууцны нийлүүлэлт, зээл олголтыг нэмэгдүүлэхээр төлөвлөсөн ч 2016 оны УИХ-ын ээлжит сонгуулиар МАН олонх болонгуутаа 3.5 их наяд төгрөгийг төсөв рүү шилжүүлсэн байна. Энэ мөнгийг төсвөөс яаж салгах вэ гэдэг асуудлыг ярих ёстой. Тиймээс холбогдох материалыг судалж байна.
Дараагийн нэг асуудал нь төмөр замтай холбоотой асуудал. Таван толгой-Гашуунсухайт чиглэлийн төмөр замыг барих уу, эсвэл Тавантолгой-Зүүнбаян чиглэлд төмөр зам барих уу гэдэг асуудал яригдаж байна. Алийг нь барих вэ гэдгээс өмнө нь ярих ёстой нэг зүйл бий. Энэ нь “Эрдэнэс Тавантолгой” 800 тэрбум төгрөгийн ашигтай ажилласан мөнгөөрөө төмөр зам барина гэж байна. Гэтэл үүний 10 хувь нь ард түмнийх атал “1072 ширхэг хувьцааны ногдол ашигаа авах уу” гэдгийг яагаад асуухгүй байгаа юм бэ.
Нөгөөтэйгүүр, түрээсийн орон сууцыг хувьчилж авах боломжтой гэсэн. Гэтэл энд нэг асуудал бий. Би энгийнээр тайлбарлая. Түрээсийн орон сууцыг нэг мк-г нь 1.1 сая төгрөгөөр баригдсан байлаа гэхэд энэ нь явсаар байгаад Засгийн газарт оруулж ирэхдээ 1 сая 856 мянга гэсэн. Дундаас нь 500 мянган төгрөгийг хувьдаа завшиж байгаа биз дээ. Шударга ёс гэдэг бол хуулийг сонголтгүйгээр хэрэглэхийг хэлнэ. Түүнээс биш энэ муу хүн, энэ сайн хүн гэж ялгах ёсгүй.
Түүнчлэн нэг зүйлд тайлбар хиймээр байна. Би өөрийгөө тагнаж, чагнасан гэж хэлээгүй. Харин мөрдөн мөшгисөн гэж хэлсэн. Тагнаж, чагнах гэдэг бол тусгай тоног төхөөрөмж ашиглахыг хэлдэг. Харин мөрдөн мөшгих бол хаана, юу хийж байна гэдэгт араас нь нүд тавихыг хэлдэг. Манай Эрдэнэт хотод 4000 иргэн бусдад залилуулсан. Тэд яагаад залилуулсан бэ гэхээр тухайн үед Эрдэнэтийн Тагнуулын даргаар ажиллаж байсан Чулуунбаатар гэдэг хүн “Жи таймд элсээч” гэж иргэдийг ятгасан. Иргэд үүнд нь итгэж, мөнгөө өгсөн. Нийт 40 тэрбум төгрөг төвлөрснөөс 20 тэрбумыг нь Чулуунбаатар тэргүүтэй хүмүүс урамшуулал нэрээр хувааж идсэн. Энэ асуудлаар иргэдтэй уулзах үеэр Эрүүгийн цагдаагийн газрын хоёр төлөөлөгч бичлэг хийж баримтжуулсан.
УИХ-ын гишүүн иргэд, сонгогчидтой уулзах уулзалтыг бичиж, баритжуулах нь хуулиар хориотой. Би хууль бус үйлдэл гаргаагүй. Үүнээс илүү зүйл яриад яах вэ. Хуулиараа ярихад болох биз” гэлээ.
Сэтгэгдэл (4)