Цаг үеийн асуудлаар УИХ-ын гишүүн Д.Хаянхярваагаас тодрууллаа.
-Ерөнхий прокурорын орлогчид нэр дэвшсэн хүмүүстэй холбоотой асуудлаар өчигдөр тохироо явсан гэсэн яриа гараад байна. Энэ талаар та тайлбар өгөөч?
-Ерөнхий прокурорын хоёр орлогчийн асуудлаар МАН бүлэг дээр хэлэлцээгүй. Энэ бол ташаа мэдээлэл. Анкет нь бол орж ирсэн. Энэ удаагийн хэлэлцэх асуудалд байгаагүйн дээр өглөө нь орж ирсэн учраас ирэх долоо хоногт хэлэлцэнэ гэсэн үндэслэлээр уг асуудлыг хойшлуулсан. Т.Эрдэнэбатыг ингэж томилно гэсэн тохироо хийсэн асуудлыг бол сонсоогүй юм байна.
-Ерөнхий прокурорын орлогчид нэр дэвшээд байгаа С.Алимцэцэг нарыг тухайн албан тушаалд хэр тохиромжтой гэж та харж байна вэ?
-Би мэдэхгүй байж энэ хоёр хүнийг тэнцэнэ, тэнцэхгүй гэж хэлж чадахгүй. Зарим гишүүдэд нээлттэй сонсгол хийж асууж, лавлах хугацаа хэрэгтэй байсан гэх үндэслэлээр орлогчийг томилох эсэх асуудал хойшлогдсон болов уу гэж харж байна. Ер нь бидэнд хамгийн чухал нь хуулинд захирагддаг л хүн хэрэгтэй.
-Ш.Батхүүгийн хөрөнгийг улс хурааж авсан. Өнөөдөр 40 сая ам.доллар хурааж авах хөрөнгөгүй гэж байна. Энэ мөнгийг яаж төлүүлэх юм бэ. Ш.Батхүүгийн хөрөнгө нь хайчсан юм бэ?
-Мэдэхгүй байна. Ямартай ч гадаад талд асуудлаа шийдчихлээ. Одоо дотооддоо асуудлаа шийдэх ёстой. Ш.Батхүү бол хангалттай хөрөнгөтэй хүн байсан. Түүний хөрөнгө хайчсан эсэхийг тогтоочих байлгүй дээ гэж найдаж байна.
-Сая Засгийн газраас Тавантолгой-Зүүнбаянгийн чиглэлд 414 км төмөр зам барих тухай шийдвэр гаргалаа. Үүнийг та юу гэж харж байгаа вэ?
-Ний нуугүй хэлэхэд би уг шийдвэрийн эсрэг байгаа хүний нэг. Ингэж Монгол Улсаар тоглож болохгүй. Өмнөх төмөр замтай адил далан босгоод үлдээчих вий гэсэн болгоомжлол байна. Тиймээс бидэнд хамгийн чухал нь эхэлчихсэн байгаа Тавантолгой-Гашуунсухайт чиглэлийн төмөр замаа л дуусгах явдал юм. Энэ бол манай улсын хамгийн гол зам шүү дээ.
Б.Лхам
Сэтгэгдэл (41)