ТЕГ-ын дарга асан, хошууч генерал Б.Хурцыг өнгөрсөн шөнө баривчилсан мэдээлэл байна.
С.Зориг агсныг хөнөөсөн хэргээр хоригдож буй Т.Чимгээ, Б.Содномдаржаа нарыг эрүүдэн шүүсэн гэх хэргийн харьяаллыг өөрчилж, Авлигатай тэмцэх газраас Цагдаагийн ерөнхий газрын Тусгай субъектын хэлтэст өнгөрсөн долоо хоногт шилжүүлсэн юм. Энэ хэрэгт тагнуулын хоёр, ШШГЕГ-ын хоёр ажилтан буюу нийт дөрвөн хүнийг С.Зоригийн амь насыг хөнөөсөн хэргийг мөрдөн шалгахдаа хууль зөрчсөн, хууль бус арга хэрэглэсэн, эрүүдэн шүүсэн гэх үндэслэлээр цагдан хориод байгаа.
Уг хэргийн улмаас генерал Б.Хурцыг түр саатуулан, тайлбар авч байгаа юм байна. Эх сурвалжийн мэдээлж байгаагаар түүнийг цагдан хорих нөхцөл байдал үүсээгүй ч зайлшгүй тодруулах шаардлагатай зүйлс байсан учраас ийнхүү мэдүүлэг авчээ.
Одоогоор харьяа дүүргийн шүүхэд Б.Хурцыг цагдан хорих санал ирээгүй байгаа ба ШШГЕГ-т хүргээгүй гэдгийг баттай эх сурвалж мэдээллээ.
Тэрбээр АТГ-ын дэд даргаар ажиллаж байгаад ТЕГ-ын даргаар томилогдсон байдаг. Улмаар БНСУ-д суух онц бөгөөд Бүрэн эрхэт Элчин сайдаар томилогдсон боловч албан үүргээ хүлээж авахаас нь өмнө эгүүлэн татсан юм.
Г.Нацаг
Сэтгэгдэл (9)