Сангийн сайд Ч.Хүрэлбаатар Засгийн газрын гаргасан шийдвэрийн талаар танилцууллаа.

Тодруулбал, Өчигдрийн Засгийн газрын хуралаанаар Сангийн яам таван асуудал хэлэлсэн байна. Тэрбээр “Монгол Улсын эдийн засаг 2020 онд зургаан хувийн өсөлттэй байхаар тооцоолсон. Мөн инфляцийн түвшин найман хувь, гадаад худалдааны тэнцэл нэг тэрбум ам.долларын ашигтай байхаар тус тус тооцсон.

2020 онд хэрэгжүүлэх үндсэн чиглэлд нийт 37 их наяд төгрөгийн санхүүжилтээр 400 орчим арга хэмжээг тусгах санал ирсэн. Үүнээс санхүүжүүлэх эх үүсвэр, өр, хэрэгжих нөхцөл байдалтай нь уялдуулан 10 их наяд төгрөгийн 116 чиглэлийн арга хэмжээг оруулж ирж байна. Уг арга хэмжээнээс улсын төсвөөс хэрэгжих зургаан их наяд төгрөгийн санал ирснээс 3.4 их наяд төгрөгөөр хэрэгжих боломжтой гэж үзэн төсөвт суулгасан. Урсгал зардалд мөн 3.7 их наяд төгрөгийн санал ирснээс улсын төсөв дээр 1.3 их наядын ажил хэрэгжүүлэх боломжтой гэж үзсэн. Хийх зүйл их байгаа. Гэхдээ манай улсын өр, санхүүгийн боломжийн хэмжээгээр хязгаарлагдаж байна. Мөн хувийн хэвшлийн байгууллага хийх боломжтой байгаа учраас ийм зохицуулалтыг хийлээ.

Засгийн газрын өрийн байдал 2016 оны төгсгөлд ДНБ-ий 78.8 хувьтай тэнцэж байсан бол 2018 оны төгсгөлд 58.9 хувь болж буурсан. Нийгмийн даатгалын сан, Эрүүл мэндийн даатгалын сангийн хөрөнгө арилжааны банкуудад байршдаг байсан бол ирэх оноос төрийн санд төвлөрүүлнэ. Энэ нь “Капитал” банкны хэргээс тодорхой харагдсан. Тиймээс даатгуулагчдынхаа эрх ашгийг бодсон ч, энэ мөнгө төрийн санд байршиж байх ёстой.

Хэдийгээр Монгол Улс 2019, 2020 онд төлөх өр, бондын төлбөр байхгүй ч гэсэн 2021 оноос эхэлж “Мазаалай” бонд, 2022 онд “Чингис бонд”-ын нэг тэрбум ам.доллар, 2023 онд “Гэрэгэ” бондын 800 сая ам.доллар, 2024 онд “Хуралдай” бонд 600 тэрбум ам.доллар нийт 2.9 тэрбум ам.долларын төлбөрийг төлөх учиртай. Тиймээс энэ төлбөрөө эдийн засагт санхүүгийн дарамт үзүүлэхгүй байхаар тооцоолсон өрийн стратегийг баталсан” гэлээ.