АТГ-аас сар бүр хийдэг хэвлэлийн хурлын үеэр сэтгүүлчдийн асуултад хариулт өглөө.
-Д.Батбаяртай холбоотой хэргийг АТГ шалгаж байгаа. Энэ талаар тодруулна уу?
-Бусдыг залилсан гэх гомдлыг ирүүлсэн. Хэрэг бүртгэлтийн хэрэг нээж, харьяалал тогтоон ЦЕГ-т шилжүүлэх санал хүргүүлсэн.
-Арбитрийн шүүх хурлаас “Эрдэнэт”-ийг санаатайгаар ялагдуулсан гэх гомдол АТГ-д ирсэн гэсэн. Энэ үнэн үү. Мөн "Жаст"-ын Ш.Батхүүд холбогдох хэрэг юу болсон бэ?
-“Эрдэнэт” үйлдвэрийн удирдлагууд баталгаа гаргаж, Монгол Улсад хохирол учруулсан хэргийг шалгаж байгаа. "Жаст" групптэй холбоотой хэрэг шүүхийн хянан шийдвэрлэх шатанд байгаа тусдаа хэрэг.
-ЖДҮХС-гаас зээл авсан гэх хэргээр 14 гишүүний хэргийг хаах санал хүргүүлсэн гэсэн. Мөн гурван гишүүнд эрүүгийн хэрэг үүсгэхээр болсон гэсэн. Нэрсийг нь хэлнэ үү?
-УИХ-ын 50 орчим гишүүнтэй холбоотой хэргийг тусгаарлан шалгаж байна. Үүнээс зээл нь зориулалтын дагуу ашиглагдаж байгаа төслүүд дээр зарим хэргийг нь хаах санал гаргасан.
Таван гишүүнд эрүүгийн хэрэг үүсгэн яллагдагчаар татсан бол үүнээс гурван гишүүнд нь эрүүгийн гэмт хэргийн шинжтэй учраас үндсэн хэргээс нь тусгаарлах саналыг прокурорын байгууллагад хүргүүлсэн.
-Прокурор асан Цэрэнсодномд холбогдох хэргийг шалгаж байгаа юу?
-Тухайн хүнтэй холбогдуулан хэрэг бүртгэлтийн хэрэг нээсэн байсныг харьяалал тогтоож цагдаагийн байгууллагад шилжүүлсэн.
-Дубайн гэрээтэй холбоотойгоор С.Баярцогтыг шалгаж байгаа гэсэн. Дубайн гэрээний шалгалтын ажиллагаа ямар шатанд явж байна вэ?
-Дубайн гэрээ, Оюу толгойтой холбоотой хэрэг шалгагдаж байгаа. Мөрдөн шалгах ажиллагааны тухайд нотлох баримт цуглуулахаас эхлээд өргөн хүрээнд ажилладаг. Олон нийтийн хүлээлт их байгаа учраас удааширч байгаа мэт санагдаж магадгүй. Гэхдээ мөрдөн шалгах ажиллагаа хууль дүрмийнхээ дагуу явагдаж байгаа.
-УБТЗ-ын дарга Д.Жигжиднямаатай холбоотой хэрэг ямар шатандаа байна вэ?
-Шалгагдаж байна.
-Шалгалтын хугацаа ийм удаан байхад хөөн хэлэлцэх хугацаа дуусах асуудал гарахгүй юу?
-Одоо шалгагдаж буй хэргүүд хөөн хэлэлцэх хугацаандаа байгаа.
Эрүүгийн болон Эрүүгийн хэрэг хянан шийдвэрлэх тухай хуулийн шинэчилсэн найруулгаар авлига, албан тушаалын хэрэгт холбогдох хэргийн хөөн хэлэлцэх хугацааг 5 жилээр тогтоосон.
Энэ нь хэргийг мөрдөн шалгахад хүндрэл учруулах асуудал бий. Зарим хэргийн хөөн хэлэлцэх хугацаа дууссан асуудал бий.
-ХХААХҮ-ийн сайд асан Т.Бадамжунай, НИТХ-ын дарга асан Ц.Сандуй гэх хүмүүсийг танайхаас шалгаж байгаа юу. Эдгээр хүн хилээр гарсан хэмээх мэдээлэл байгаа?
-Эдгээр хүнтэй холбоотой мөрдөн шалгах ажиллагаа явуулаагүй.
-Х.Баттулга, А.Гансүх нарт холбогдох 250 сая ам.долларын хэргийг танайх шалгаж байсан. Одоо шалгаж байгаа юу?
-Энэ хэргийг прокурорын байгууллагаас тодорхой үндэслэл гарган түдгэлзүүлсэн. Түүнээс биш хаагаагүй. Хариуцсан прокуророос нь үндэслэлийг нь асуух хэрэгтэй.
-ТЕГ-ын дарга асан Б.Хурцыг танайхаас шалгаж байсан. Түүнийг хэзээнээс эхэлж шалгасан бэ?
-ТЕГ-ын даргатай холбоотой асуудлаар 2018 оны 12 дугаар сард нийслэлийн Прокурорын газраас хэрэг бүртгэлтийн хэрэг нээж, харьяалал тогтоож ирүүлсэн. АТГ-ын мөрдөн шалгах хэлтсээс мөрдөн шалгалтын ажиллагаа явуулж байх хугацаанд буюу өнгөрөгч долоо хоногийн баасан гарагт нийслэлийн Прокурорын газраас хэргийг татаж хянаад тухайн хэргийг шалгах харьяалал цагдаагийн байгууллага гэж тодорхойлон цагдаагийн байгууллагад шилжүүлсэн. Түүнээс биш Тагнуулын байгууллагад шалгасан хэрэг биш.
Г.Алимаа
Сэтгэгдэл (2)