Тагнуулын ерөнхий газрын дарга асан, хошууч генерал Б.Хурц цагтаа улстөрчид болоод бизнесийн талбарт нөлөө бүхий эрхмүүдийн өвдгийг чичрүүлж явсан нэгэн. Явсан ч гэж дээ. Одоо ч түүнээс жийрхэж, хальдчих хүмүүс ганц нэгээр тогтохгүй болов уу.
Улс төрийн нэрт зүтгэлтэн С.Зоригийн амь насыг хөнөөсөн хэрэгт сэжиглэгдсэн Д.Энхбатыг Белги, Герман Улсаар дамжуулан Монгол Улсад авчирсан хэргээс олны анхааралд өртсөн тэрбээр ТЕГ-ын ажилтнаас АТГ-ын дэд дарга хүртэл суга дэвшиж, ТЕГ-ын даргаар томилогдсон.
Хажуугаар нь генерал мөрдэс зүүсэн гээд багагүй хугацаанд Монгол Улсын хууль хяналтын байгууллагын тэргүүнд заларсан нэгэн. УИХ-ын чуулганы үеэр “Цааш нь үргэлжлүүлж ярих уу, яах уу” гэж хэлсэн түүний сануулга бүхий үгэнд гишүүдийн олонх нь хулмагнаж харагдсан. Харамсалтай нь, төдийгөөс өдийг хүртэл албан тушаал дэвшсэн түүний үлдээсэн мөрөөр хууль хяналтын байгууллагынхан орж, энэ сарын 23-ний шөнө түр саатуулсан юм. Улмаар 14 хоногийн хугацаатай цагдан хорих шийдвэрийг Чингэлтэй дүүргийн Эрүүгийн хэргийн анхан шатны шүүхээс гаргаснаар Б.Хурцын араас ачигдах дараагийн хүн бэ гэдэг асуултыг тавихад хүргэв.
Учир нь С.Зоригийн амь насыг хөнөөсөн хэрэгт буруутгагдаж, шүүхээс ял сонссон Т.Чимгээ, Б.Содномдаржаа нарыг хойшлуулашгүйгээр баривчлах үед гүйцэтгэх ажлыг гардан гүйцэтгэхдээ хууль зөрчсөн гэдгийг нэр бүхий УИХ-ын гишүүд хэлсэн удаатай. Тодруулбал, дээрх иргэдийг баривчилах гүйцэтгэх ажлын төлөвлөгөөнд Улсын Ерөнхий прокурорын орлогч прокурор Г.Эрдэнэбат гарын үсэг зурж баталгаажуулсан нь хууль зөрчсөн үйлдэл гэж буй. Прокурор хүн бол тухайн хэргийг хуулийн хүрээнд мөрдөн шалгаж байна уу, хэргийг зүйлчлэхдээ хуулийг зөв хэрэглэсэн эсэхэд хяналт тавих үүрэгтэй. Гэтэл гүйцэтгэх ажлын төлөвлөгөөнд гарын үсэг зурснаар Г.Эрдэнэбат прокурор өөрийнхөө тойрохыг зурсан гэхэд болно. Энэ оны эхээр Улсын Ерөнхий прокурорын орлогч прокуророор ажиллах хуулийн хугацаа дуусч, тэрбээр өөрийн хүсэлтээр ажлаа өгсөн. Гэвч эрх баригчийн зүгээс түүнийг “огцрууллаа” гэж мэдэгдсэн.
Ийн мэдэгдсэний цаад учир магадгүй “Эл хэрэгт буруутгагдах дараагийн хүн нь чи шүү” гэдгийг сануулсан далд явуулга ч байж мэдэхээр.
Түүнчлэн С.Зоригийн амь насыг хөнөөсөн хэргийг мөрдөн шалгах ажилд оролцсон нэр бүхий дөрвөн албан тушаалтан өдгөө Урьдчилан хорих 461 дүгээр хоригдож байна. Тэдгээрийн хувьд Т.Чимгээ, Б.Содномдаржаа нарыг эрүүдэн шүүх замаар хэрэг хүлээлгэсэн, мөрдөн шалгах ажлыг хууль зөрчиж хийсэн хэрэгт буруутгагдсан. Ийнхүү эдгээр дөрвөн хүний араас Б.Хурц нэмэгдээд буй бол Г.Эрдэнэбат прокурор араас нь ачигдах эсэх нь цаг хугацааны асуудал болж таарах байх.
Хамгийн гол нь хэргийн мөрдөн шалгах ажиллагаанд хяналт тавих ёстой прокурор хүн яагаад гүйцэтгэх ажлын төлөвлөгөөнд гарын үсэг зурсан бэ гэдэг нь хачирхалтай.
Магадгүй хэн нэгний даалгавраар үүнийг хийсэн үү, эс бөгөөс гарын үсэг зурах өөр нэг шалтгаан байсан уу. Г.Эрдэнэбат прокурорын хувьд ийм бичигт гарын үсэг зурах ёсгүй гэдгээ ухамсарлах хэмжээний мэдлэгтэй хүн. Гэтэл яагаад. Үүний хариулт магадгүй тайлагдахгүй нууц хэвээр үлдэх байх.
Өдгөө Тагнуулын Ерөнхий газрын дарга Гэрэлийн гарын үсэггүйгээр нэг ч үг амнаасаа унагаахгүй гэж Б.Хурц мэдэгдсэн. Б.Хурцыг хурцалж, улс дамнуулсан хүний хулгай хийлгэж, улс төр, нийгмийн нэрт зүтгэлтний амиа алдсан хэргийн мөрдөн байцаалтад хөндлөнгөөс нөлөөлсөн эрхэм чухам бэ гэдэг асуулт оньсого хэвээр байсаар. Энэ асуултын хариултын араас нэхсэн баривчилгаа ээлж дараатай үргэлжлэх нь лавтай. Гэхдээ чухам хэн, хэнийг баривчлах бол гэдэг нь тун сонин. Б.Хурцын араас хэн ачигдах бол.
Г.Алимаа
Сэтгэгдэл (76)