Ерөнхийлөгч, УИХ-ын хооронд зөвшилцөх байдлаар нэр дэвшүүлж томилдог Авлигатай тэмцэх газар, прокурор, шүүхийн удирдлагыг хуульд өөрчлөлт оруулах замаар Үндэсний аюулгүй байдлын зөвлөмжийн хүрээнд чөлөөлж, томилдог болсон билээ. Энэ дагуу Улсын ерөнхий прокорур түүний орлогч, Дээд шүүхийн ерөнхий шүүгчийг үүрэгт ажлаас нь чөлөөлсөн билээ. Харин АТГ-ын дэд дарга Ц.Нямдорж өөрийн хүсэлтээр ажлаа өгснийг эс тооцвол Х.Энхжаргал дарга албан тушаалаа өгөөгөөгүй байгаа юм. Тэгвэл УИХ-аар энэ долоо хоногт хэлэлцэх асуудлын дараалалд АТГ-ын дарга, дэд даргын асуудлыг хэлэлцэхээр даргын дэргэдэх зөвлөлөөс шийдвэрлээд буй.

Үүнтэй холбоотойгоор УИХ дахь МАН-ын бүлэг өнөөдрийн хуралдаанаараа АТГ-ын удирдлагыг хэлэлцэхээр болжээ. Эх сурвалжийн хэлж буйгаар АТГ-ын даргад З.Дашдаваа, дэд даргад Ж.Батсайхан нарыг нэр дэвшүүлж томилуулахаар тохиролцсон сурагтай.

З.Дашдаваа нь өдгөө ЦЕГ-ын дэд даргаар ажиллаж байна. Тэрбээр цагдаагийн албанд 24 дэх жилдээ ажиллаж байгаа юм. Түүний хувь Хэнтий, Говь-Алтай аймагт эрүүгийн төлөөлөгч, тасгийн дарга, Баянгол, Сонгинохайрхан дүүрэгт эрүүгийн төлөөлөгч, тасгийн дарга, сүүлд 2008-2014 онд ЦЕГ-ын Дотоод хяналт шалгалт, аюулгүй байдлын тасаг, хэлтсийн даргаар ажилласан туршлагатай. Хууль сахиулах их сургуульд Цагдаагийн сургуулийн захирлаар гурван жил ажилласан түүнийг Сүхбаатар дүүргийн Цагдаагийн хоёрдугаар хэлтсийн даргаар ажиллаж байхад нь ЦЕГ-ын дэд даргаар томилсон билээ. Түүний хувьд ямар нэг асуудалд нэр холбогдож байгаагүй, салбартаа харьцангуй нэр цэвэр нэгэн юм.

Үүнээс гадна тэрбээр Засгийн газрын Хэрэг эрхлэх газрын дарга Л.Оюун-Эрдэнийн төрөл юм байна. 

Харин Ж.Батсайхан нь Цагдаагийн дээд сургуулийг Хуульч, эрх зүйч мэргэжлээр төгссөн. ОХУ-ын Дотоод явдлын яамны Удирдлагын академид Хууль зүйн ухааны доктор зэрэг хамгаалсэн нэгэн. Тэрбээр 1990 оноос хуулийн салбарт ажиллаж эхэлсэн бөгөөд 2007-2016 оны хооронд АТГ-т хэлтсийн даргаар, 2016-2017 оны хооронд Шүүхийн шийдвэр гүйцэтгэх ерөнхий газрын дэд даргаар ажиллаж байсан туршлагатай юм.

Түүнийг Ерөнхийлөгчийн Тамгын газрын дарга З.Энхболын ойрын хүн гэх яриа бий. Хэдийгээр Ж.Батсайхан нь АТГ-ын дэд даргад нэр дэвшсэн боловч хуулийн шаардлага хангахгүй юм байна. Учир нь тэрбээр гүйцэтгэх ажлын туршлагагүй ажээ. 

Улмаар Ерөнхийлөгчөөс нэр дэвшүүлсэн З.Дашдаваа, Ж.Батсайхан нарыг АТГ-ын удирдлагад МАН-ын бүлгээр тус асуудлыг хэлэлцээд гишүүдийн олонхи дэмжлээ. 

С.Сүлд