Хэнтийн 42 дугаар нөхөн сонгуульд нэр дэвших намууд Сонгуулийн ерөнхий хороонд бүртгүүлж байна. Тодруулбал, намууд өнөөдөр 13.00 цагаас өмнө амжиж бүртгүүлэх ёстой юм. Энэ үеэр МАХН-ын нарийн бичгийн дарга Б.Тулгаас зарим зүйлийг тодрууллаа.

-Хэнтий аймгийн 42 дугаар сонгууль удахгүй явагдана. Энэ хүрээнд намууд бүртгүүлж байна. Уг сонгууль хэр шударга явагдана гэж үзэж байна вэ?

-Хэнтий аймгийн 42 дугаар тойргийн иргэд сонгогчдын хувьд сүүлийн хоёр жилийн турш Үндсэн хуулиар олгогдсон эрхээ эдэлж чадахгүй байна. Өнгөрсөн жил Сонгуулийн ерөнхий хорооноос нөхөн сонгуулийг зарлаж, улс төрийн намуудад батламж гардуулсан. Гэвч жилийн дараа дахин батламж гардуулж байна. Энэ нь манай улсын зарим төрийн байгууллагууд хуулийг завхруулж байгаагаас болж нийт сонгогчдын эрх ашгийг зөрчсөн үйлдэл болж байна. Тиймээс нөхөн сонгуулийн материалаа өгөхдөө СЕХ-ны эрх бүхий албан тушаалтнуудад лавлаж асуулаа. Өөрөөр хэлбэл, “Та бүхэн энэ алдаа завхралаа засахад бэлэн үү” гэж асуусан. Гэтэл “Бид дээрээс өгсөн үүргийн дагуу гүйцэтгэдэг” гэсэн хариулт өгсөн. Тухайлбал, 2017 оны Ерөнхийлөгчийн сонгуульд 16 мянган санал нэг шөнийн дотор алга болсон хэрэг баримт нотолгоотой байсаар байтал шийддэггүй. Тиймээс Хэнтийн аймгийн 42 дугаар нөхөн сонгуулиар уг байдлыг засч, монголчууд төр барих эрхээ олж авч чадах уу гэсэн асуултад хариулт өгсөн сонгууль болох байх. Нийгэмд тулгамдсан асуудлыг шийдэхийн тулд МАХН энэ удаагийн сонгуульд орж ялалт байгуулах ёстой.

-Нам дотроо нэр дэвшихээр өрсөлдөж байгаа хүмүүс байгаа юу?

-Үүнийг зарлах эрт байна. Мэдээж 2017 оны Ерөнхийлөгчийн Хэнтий аймгийн сонгуульд нэр дэвшигч С.Ганбаатар ялалт байгуулсан. Энэ дүнгээс харвал тэрбээр нэр дэвшигч мөн. Түүнчлэн Хэнтий аймгийг удирдаж байгаа Ононбаяр нэр дэвших магадлалтай. Мөн Хэнтий аймгийн Засаг даргаар ажиллаж байсан Жаргал, Хэнтий аймгаас гаралтай Н.Энхбаяр дарга нэр дэвших магадлалтай хүний нэг.

Б.Лхам