Хүүхэд, гэр бүл, залуучуудын хөгжлийн газраас Монголын морин спорт, уяачдын холбоотой хамтран энэ сарын 12-нд болох "Дүнжингарав" уралдааныг зохион байгуулах гэж байна. Тус уралдааныг Хүй долоон худагт зохион байгуулах бөгөөд бүртгэл энэ сарын 10, 11-ний өдөр болох юм байна. Үндэсний их баяр наадмын тухай хуульд зааснаар хурдан морины уралдаанд 7 болон түүнээс дээш насны хүүүхэд морь унаж оролцох боломжтой талаар Хүүхэд, гэр бүл, залуучуудын хөгжлийн газраас Монголын морин спорт, уяачдын холбоо хамтран мэдээлэл хийлээ. Энэ талаар Гэр бүл, хүүхэд, залуучуудын газрын Хууль эрх зүй, хамтын ажиллагааны газрын дарга А.Энхбаатар "Хурдан морины уралдааны үеэр хүүхдийн эрхийг хамгаалах тухай асуудалд хоёр байгууллага нэгдсэн нэг ойлголтод хүрсэн. Уяачид унаач хүүхдийг заавал даатгалд хамруулах ёстой. Даатгалын нөхцөл байдал өнгөрсөн жилийг хүртэл нөхөн олговорын хэмжээ хамгийн дээд тал нь таван сая төгрөг байсан. Мөнгөн дүнгийн хэмжээ нь гэмтэж, бэртсэн хүүхдийн эрүүл мэндийг нөхөн сэргээхэд хангалттай биш.
Тиймээс даатгалын компаниудтай тохиролцсоны үндсэн дээр даатгалын жилийн хураамж 100 мянган төгрөг, нөхөн олговорын хэмжээ 20 сая төгрөг хүртэл байх зохицуулалт хийсэн.
Уяачид нэг ижил стандартаар нийт 330 суманд 100 мянган төгрөгөөр унаач хүүхдээ даатгуулна. Энэ даатгалд зөвхөн уралдааны үед гарах эрсдэлээс гадна ахуйн шинжтэй ослуудын тохиолдол багтах бөгөөд нэг жилийн хугацаатай. Мөн даатгалын тохиолдол гарахад хүүхдийг яаралтай нарийн мэргэжлийн эмчийн хяналтад, зориулалтын тээврийн хэрэгслээр эмнэлэгт хүргэх зардлыг даатгалын нөхөн олговорт багтаана” гэв.
Харин ММСУХ-ны ажлын албаны дарга Б.Батбаатар "Унаач хүүхдийг эрсдэлээс хамгаалахын тулд талуудын оролцоо чухал. Даатгалын компаниудтай тодорхой шаардлага тавьж, гэрээ байгуулах чиглэл барьж байна. Даатгалын хураамж 100 мянган төгрөг болсноос хойш 4000 орчим хүүхэд даатгуулж, 49 удаагийн даатгалын тохиолдол гарсан.
Даатгал улсын хэмжээнд хийгдэх ёстой учраас 330 суманд хүрч ажиллах боломжтой компанийг сонгож гэрээ байгуулах шаардлагатай.
Монгол Улсын эмийн бүртгэлд хүний биеийг, хүүхдийг биеийг давжааруулдаг эм, бэлдмэл байхгүй. Шинжлэх ухаанд ч тийм үйлчилгээтэй эм байхгүй гэдгийг эрдэмтэн судлаачид хэлдэг" гэв.
Сэтгэгдэл (1)