Засгийн газрын энэ долоо хоногийн хуралдаанаар Байгалийн түүхийн музейг Их тэнгэрийн аманд барих шийдвэр гаргасан билээ. Үүнээс үүдэж Байгалийн түүхийн музейн газрыг яах вэ гэдэг олны анхаарлыг татаад буй. Тэгвэл тус газрыг хэрхэх талаар Боловсрол, соёл, шинжлэх ухаан, спотын сайд Ё.Баатарбилэг мэдээлэл өглөө.

Тэрбээр, “Одоогийн байршилд долоон давхар музей барихаар болсон. Зураг төслийг нь улсын төсвийн хөрөнгө оруулалтаар 280 сая төгрөгөөр хийсэн. Хаадын музей ч гэдэг юм уу Монголын түүхийг харуулсан гадна, дотныхонд зориулсан музейтэй болъё гэж байгаа юм. Төсөв байхгүй учраас буцалтгүй тусламж, хөнгөлөлттэй зээл юу байна хөөцөлдөж байна. Одоогийн байршилд музейн барилгыг яагаад барьж болохгүй байгаа талаар хүмүүс их сонирхож байна. Байгалийн түүхийн музейд том том үлэг гүрвэлийн яснууд багтахгүй байгаа учраас Их тэнгэрийн аманд байгуулах шийдвэр гарсан. Их тэнгэрийн ам олон жил олон нийтэд хаалттай, дарга нар л ордог гээд байгаа энэ газарт маш сайхан музей байгуулаад олон нийтэд нээлттэй болгохоор шийдвэрлэсэн ” гэлээ.

Р.Хишиг