Оюутолгойн асуудлаар УИХ-ын гишүүн Д.Дамба-Очироос тодрууллаа.

-Оюутолгойн ажлын хэсгийн дүгнэлтийг маргааш танилцуулна гэсэн. Энэ талаар мэдээлэл өгнө үү?

-Өнгөрсөн долоо хоногт “Рио Тинто” компанийн удирдлагууд Монголд ирсэн. Энэ хүрээнд маргааш Оюутолгойн гэрээг шалгах ажлын хэсгээс гаргасан дүгнэлтийг танилцуулна.  Уулзалтаар “Рио Тинто”-гийн зүгээс Оюунтолгойн гэрээний нэг үг, өгүүлбэр, таслал, цэгийг солихгүй гэж мэдэгдсэн байна лээ. Гэхдээ уг асуудлыг УИХ-аас шийднэ. Учир нь Хөрөнгө оруулалтын гэрээ бол УИХ-аас баталсан гэрээ. Үндсэндээ ажлын хэсгийн тайлангууд бэлэн болсон.

-“Рио Тинто” компанийн удирдлагууд ажлын хэсгийн дүгнэлттэй танилцсан учраас ийм байр суурь илэрхийлж байна гэж ойлгож болох уу?

-Ажлын хэсгийн дүгнэлттэй танилцаж эхэлсэн. Уг асуудлаар хэлэлцэх үеэр “Рио Тинто”-гийн зүгээс өөрсдийн саналаа гаргах байх.

-Аудитын газраас ямар дүгнэлт ирүүлсэн бэ?

-Дубайн гэрээний дүгнэлтийг ирүүлсэн. АТГ-аас хөрөнгө оруулалт, хувь нийлүүлэгчдийн гэрээг шалгасан тухай дүгнэлт ирүүлсэн.

-Тэгвэл УИХ-ын гишүүдийн гар дээр ажлын хэсгийн дүгнэлт хараахан ирээгүй юм байна. Тийм үү?

-Ажлын хэсгийнхэн дүгнэлтээ өгөөд удаж байна. 

-Уулзалтын үеэр “Рио Тинто”-гийн зүгээс гэрээнд өөрчлөлт оруулбал далд уурхайг зогсооно гэсэн зүйл яригдсан юм уу?

-Мэдэхгүй. Гэрээг сайжруулах тал дээр “Рио Тинто”-той ярилцаж, тохиролцох боломжтой.

-УИХ хөрөнгө оруулагчдын талд дахин буулт хийх болов уу гэсэн хардлага байна. Тодорхой шийдвэр гаргаж чадах болов уу?

-УИХ, Байнгын хорооноос тодорхой тогтоолын шийдвэр гарна.

-Шалгалтаар ноцтой асуудал илэрсэн болов уу?

-Ноцтой гэж яригдаж байгаа арваад төрлийн дүгнэлт бий. Уг асуудлаар гишүүд хэлэлцээд явах байх.

Б.Лхам