ТЕГ-ын дарга асан, хошууч генерал Б.Хурцыг Мөрдөн байцаах албанаас энэ сарын 23-нд 48 цагийн хугацаатай саатуулж улмаар үргэлжлүүлэн 15 хоног цагдан хорих шийдвэрийг Чингэлтэй дүүргийн Эрүүгийн хэргийн анхан шатны шүүхээс гаргасан билээ. Ийн хорих болсон нь 2002 оны Эрүүгийн хуулийн 133 дүгээр зүйл ангиар буюу гүйцэтгэх ажлын журам зөрчсөн хэргээр шалгаж эхэлсэнтэй холбоотой.

Тэгвэл 15 хоногийн хугацаатай хоригдсон Б.Хурц өнөөдөр үдээс хойш суллагдах ёстой. Гэхдээ түүнийг суллах эсэхийг шүүхээс ямар шийд гарахаас 100 хувь хамаарах юм.

Учир нь прокуророос түүнийг үргэлжлүүлэн хорих санал гаргасан бөгөөд уг асуудлыг өнөөдөр хэлэлцэнэ гэсэн мэдээлэл байна.

Хэрвээ шүүхээс түүнийг үргэлжлүүлэн хорих шийд гаргавал Б.Хурц хүссэн, хүсээгүй мэдүүлэг өгөх нь тодорхой болох байх. Учир нь тэрбээр ТЕГ-ын даргын гарын үсэггүйгээр мэдүүлэг өгөхгүй гэж мэдэгдээд байсан юм. Түүнтэй хамт ТЕГ-ын хэд хэдэн албан хаагчид мөн хоригдсон. Түүнчлэн С.Зоригийн амь насыг хөнөөсөн хэргийг мөрдөн шалгахад оролцсон зарим албан хаагчдыг ажлаас түр чөлөөлсөн гэх мэдээлэл бий.

Эндээс үзвэл, Б.Хурц өнөөдөр суллагдах уу эсвэл үргэлжлүүлэн хоригдох уу гэдэг нь олны анхаарлыг татаж байна.

Р.Хишиг