Ардчилсан намын ахмад гишүүд намын дарга С.Эрдэнийг шалгуулахаар АТГ-д хүргүүлж байна. Энэ талаар ахмад гишүүн М.Цэдэн-Ишээс дараах зүйлийг тодрууллаа.
-Та бүхэн өнөөдөр хэвлэлийн хурал зарлаж, АТГ-д бичиг хүргүүлнэ гэлээ. Ямар утга агуулгатай юм бол?
-Сүүлийн үед С.Эрдэнэ даргатай холбоотой асуудал их гарч байна. Тухайлбал, Нийгмийн даатгалын санд их хэмжээний хохирол учруулсан асуудал, Тэтгэврийн сангаас нас барсан иргэдийн нэр дээр тэтгэвэр, зээл олгосон нэрийдлээр улсад 40 гаруй тэрбум төгрөгийн хохирол учруулсан, Хөгжлийн бэрхшээлтэй иргэдийн ордон барих нэрээр газар авч хувьдаа завшсан, Найрамдал зуслангийн газрын луйвар зэрэг асуудалд үнэхээр холбоотой эсэхийг шалгаж, үнэн зөв мэдээллийг иргэдэд өгөөч гэж байгаа юм. Учир нь намын даргатай холбоотой уг мэдээллээс болж 2020 оны УИХ-ын сонгуульд АН ялагдаж болзошгүй тул ахмад гишүүд нэгдэн, Авлигын эсрэг хуулийн 9.1-д “Иргэн, хуулийн этгээд авлигын асуудлаар АТГ-т өргөдөл, гомдол гаргаж, мэдээлэл өгч болно” гэж заасны дагуу өргөдөл гаргаж байна.
Энд нэг зүйлийг нэмж хэлэхэд намын даргаа өөрчлөхөөр биш харин намын дарга хүн нэр хүнд цэвэр байх ёстой гэдэг шаардлага тавьж байгааг иргэд ойлгох хэрэгтэй. Намын дүрмээ биелүүлэхгүй дарга, гишүүн байх ёсгүй. Тиймээс үнэхээр авлига, албан тушаалтай холбоотой асуудал байвал шалгуулах нь зөв.
-Дүүргүүдийн АН-ын дарга нарыг сольж байгаа гэсэн.Ямар учиртай юм бол?
-Сайн мэдэхгүй байна.
-Үр дүн гарна гэж бодож байна уу?
-Хуулийн байгууллагуудын шинэчиллээ л гэсэн. Үнэн зөвөөр нь шийдэх байх гэж горьдож байна.
-Ахмад гишүүд нэгдэж, санал гаргалаа. Хэрвээ хуулийн байгууллагаар шалгуулаад дорвитой үр дүнд хүрэхгүй бол яах вэ?
-Тэмцлийн дараагийн хэлбэрт шилжихийг үгүйсгэхгүй. Сураагүй биш, 30 жил жагсаад, суулт зарлаж, өлсөж хүртэл үзсэн хүн шүү дээ. Тэмцэнэ дээ.
Б.Лхам
Сэтгэгдэл (6)