Хан-Уул дүүргийн 15 дугаар сургуулийн 529 хүүхэд сүрьеэ өвчний нян илэрсэн бөгөөд 38 сурагч, нэг багш халдваргүй сүрьеэтэй хэмээн оношлогдсон. Энэ хэрэг ил болоход эцэг эх, олон нийтийн зүгээс тус сургуулийн удирдлагаас гадна эрүүл мэндийн байгууллагын ажилтнуудыг хариуцсан ажилдаа хайхрамжгүй, мэдлэггүй, “худалдагдсан” хэмээн буруутгасан. Тэгвэл 2018 онд Монголын өрхийн анагаах ухааны мэргэжилтнүүдийн нэгдсэн холбооны тэргүүн Ш.Хажидмаа Хан-Уул дүүргийн 15 дугаар сургуулийн 20 орчим хүүхэд сүрьеэтэй гэсэн мэдээлэл гаргаж анхааруулж байжээ. Гэвч тус сургуулийн удирдлагууд нэр хүндэд халдсан хэмээн үзэн түүнийг шүүхэд өгч ялсан байна.
Тодруулбал, Хан-Уул дүүргийн 15 дугаар сургуулийн удирдлага уг мэдээллийг худал хэмээн үзэж, Нийслэлийн Иргэний хэргийн давж заалдах шатны шүүхэд нэхэмжлэл гаргажээ. Үүгээр ч зогсохгүй Монголын өрхийн анагаах ухааны мэргэжилтэнгүүдийн нэгдсэн холбооноос 4,700,000 төгрөгийн хохирлыг барагдуулахыг хүссэн байна.
Уг хэргийг Нийслэлийн Иргэний хэргийн давж заалдах шатны шүүхийн шүүгч Б.Баатар, Д.Уранчимэг, Ө.Уянга нар хэрэгсэхгүй болгох тогтоол гаргасан байна.
Тогтоолд,
1. Иргэний хуулийн 21 дүгээр зүйлийн 21.2, 21.3, 511 дүгээр зүйлийн 511.2-т заасныг тус тус баримтлан Нийслэлийн Хан-Уул дүүргийн 15 дугаар сургуулийн 20 орчим хүүхэд сүрьеэтэй болсон жишээ байна” гэсэн мэдээлэлд Нийслэлийн Хан-Уул дүүргийн 15 дугаар бүрэн дунд сургуулийн ажил хэргийн нэр хүнд гутаагдсаныг сэргээж , уг мэдээг тараасан хэлбэр хэрэгслээр няцаалт хийхийг Монголын өрхийн анагаах ухааны мэргэжилтнүүдийн холбоо “Гишүүддээ үйлчилдэг төрийн бус байгууллагад даалгаж, нэхэмжлэлийн шаардлагаас эдийн бус гэм хорын хохиролд 4,700.000 төгрөг гаргуулах хэсгийг хэрэгсэхгүй болгосугай.
2. Иргэний хэрэг шүүхэд хянан шийдвэрлэх тухай хуулийн 57 дугаар зүйлийн 57.1, Улсын тэмдэгтийн хураамжийн тухай хуулийн 7 дугаар зүйлийн 7.1.2, 41 дүгээр зүйлийн 41.1.3-т зааснаар нэхэмжлэгчийн гаргасан нэхэмжлэл тэмдэгтийн хураамж төлөхөөс чөлөөлөгддөг болохыг дурдаж, хариуцагч “Монголын өрхийн анагаах ухааны мэргэжилтнүүдийн холбоо”, Гишүүддээ үйлчилдэг төрийн бус байгууллагаас тэмдэгтийн хураамжид 70,200 төгрөгийг гаргуулж улсын төсвийн орлогод оруулсугай.
3. Иргэний хэрэг шүүхэд хянан шийдвэрлэх тухай хуулийн 120 дугаар зүйлийн 120.2-т зааснаар зохигч, тэдгээрийн төлөөлөгч, өмгөөлөгч анхан шатны шүүхийн шийдвэрийг гардан авсан өдрөөс хойш 14 хоногийн дотор Нийслэлийн Иргэний хэргийн давж заалдах шатны шүүхэд давж заалдах гомдол гаргах эрхтэйг дурдсугай” гэжээ.
Шүүгч хүн хуулийн хуульд захирагдаж, өөрийн итгэл үнэмшлээрээ шийдвэр гаргадаг. Гэтэл нийгмийг цочоосон аймшигтай хэрэг гарчхлаа гээд анхааруулсан хүнийг "шийтгэж", нэр төрөө хайцаалсан ядмагхан эрх мэдэлтнүүдийг "өмгөөлсөн" чинь ямар учиртай юм бэ. Хэрэвзээ, тухайн үед та үнэн, худлыг зөв дэнсэлсэн бол өнөөдөр олон зуун хүүхэд сүрьеэгийн халдвар авах байсан ч юм уу, үгүй ч юм уу.
Тиймээс Б.Баатар шүүгч ээ, та яагаад"сүрьеэг хамгаалсан" шийдвэр гаргасан юм бэ. Үүнийгээ тайлбарлана уу.
Р.Хишигжаргал
Сэтгэгдэл (19)