Бүхнийг материаллаг эдээр зүйрлэх дуртай бид хүүхдийг цагаан цаастай адилтгадаг. Тэр цаасан дээр хайр, халамж, ёс суртахуунт ирээдүйн зөв иргэнийг зурах байтал нигүүлсэлгүй гараар айдсыг сийрүүлэх нь өнөөгийн нийгэмд цөөнгүй болжээ.
Тэдэнд учруулах хохиролд тооцох хариуцлага дэндүү хөнгөн учраас ингэж тодотгосон юм. Бүр хүчирхийлэл үйлдэгч этгээдэд гурван жил хүртэлх тэнэсэн, хохирлын хэмжээ нөхөн олговор гэгчээр дүйцүүлэх тохиолдол байна. Тодруулбал, Эрүүгийн хуулийн 16.8 дугаар зүйл буюу хүүхдэд садар самууныг сурталчлах, уруу татах заалтын 1-т ийн заажээ.
“1 . Хүүхдэд садар самууныг сурталчилсан хэвлэл, ном зохиол, зураг, кино, дүрс бичлэг, бусад зүйлийг зориуд үзүүлсэн, өгсөн, сурталчилсан; хүүхдээр садар самуун үйлдэл хийлгэсэн; хүүхдэд биеэ үнэлэх, бэлгийн харьцаанд орохыг санал болгосон бол хоёр мянга долоон зуун нэгжээс таван мянга дөрвөн зуун нэгжтэй тэнцэх хэмжээний төгрөгөөр торгох, эсхүл хоёр зуун дөчин цагаас долоон зуун хорин цаг хүртэл хугацаагаар нийтэд тустай ажил хийлгэх, эсхүл зургаан сараас нэг жил хүртэл хугацаагаар зорчих эрхийг хязгаарлах, эсхүл зургаан сараас нэг жил хүртэл хугацаагаар хорих ял шийтгэнэ” гэжээ.
Мөн хуулийн 6.7 дугаар зүйл буюу гэм буруугаа хүлээн зөвшөөрсөн хүнд оногдуулах хорих ялыг хөнгөрүүлэх, хорих ялаас чөлөөлөх, албадлагын арга хэмжээг хэрэглэх ийн 1.1-д “Энэ хуулийн тусгай ангид хорих ялын дээд хэмжээг гурван жил хүртэл, түүнээс бага хугацаагаар тогтоосон гэмт хэрэг үйлдсэн хүн тухайн гэмт хэргийн улмаас учруулсан хохирлоо нөхөн төлж, эсхүл гэмт хэргийн улмаас учруулсан хохирлоо нөхөн төлөхөө илэрхийлсэн бол ялаас чөлөөлөх, эсхүл гурван жил хүртэл хугацаагаар тэнсэж үүрэг хүлээлгэх, эрх хязгаарлах албадлагын арга хэмжээ хэрэглэх” хэмээн тусгасан байна
Энэ бол зөвхөн “хүүхдэд садар самууныг сурталчлах, уруу татах”-д ногдуулж буй хариуцлага гэдгийг онцлоё. “Үндэс нь зөв мод эгц ургадаг” гэдэг. Гэтэл хэрэг гарах “суурийг тавигч багшийг” хөхиүлэн дэмжиж, толгойг нь илэх биш хийсэн үйлдэлдээ хуулийн хатуу хариуцлага хүлээдэг, ялын бодлого нэн шаардлагатай байна.
Уураг тархи нь байтугай бие махбод нь бүрэн хөгжөөгүй хүүхдэд садар самуун дүрс бичлэг үзүүлсэн, өгсөн, садар самуун үйлдэл хийлгэсэн, биеэ үнэлэх, бэлгийн харьцаанд орохыг санал болгосон этгээдэд мөнгөн торгууль, зургаан сарын ял ногдуулах нь хэр шударга вэ гишүүд ээ. Цаашлаад PC тоглоомны газар порно сайт руу хандах боломжгүй болгох, энэ төрлийн хуудас, материал хэвлэсэн этгээдэд тооцох хариуцлагыг үйлдсэн этгээдтэй адил байлгамаар байна.
Р.Хишигээ
Сэтгэгдэл (3)