Төрийн байгуулалтын өнөөдрийн хуралдаанаар УИХ-ын гишүүн Х.Нямбаатар нарын таван гишүүн энэ сарын 15-ны өдөр өргөн мэдүүлсэн УИХ-ын чуулганы хуралдааны дэгийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд хэлэлцэх эсэхийг хэлэлцэж дэмжлээ.
Энэ үеэр УИХ-ын гишүүн Ж.Мөнхбат “Үндсэн хуулийн төсөл энэ хаврын чуулганаар өргөн баригдах уу. Үндсэн хуульд нэмэлт оруулахаар хэлэлцвэл бүтэн нэг сарын турш хэлэлцдэг. Өөр ямар нэгэн асуудал дундуур нь хэлэлцэх хориотой. Миний хувьд Үндсэн хуульд өөрчлөлт оруулахыг дэмжиж байгаа. Харин хэзээ хэлэлцэх вэ. Энэ хаврын чуулганаар хэлэлцэж амжих уу” гэхэд УИХ-ын гишүүн Д.Лүндээжанцан “Үндсэн хуулийн нэмэлт өөрчлөлтийн асуудал сүүлийн 13, 14 жил идэвхтэй яригдаж байна. Уг нь манай УИХ, Засгийн газар, Ерөнхийлөгч, шүүх эрх мэдлийн байгууллагууд, нутгийн захиргааны байгууллагууд эв хавандаа орж, гацаагүй зөв тэнцвэртэй ажиллавал Үндсэн хуульд заасан хүний эрх эрх чөлөө хангагдана. Монгол Улсын нийгэм, эдийн засгийн хөгжил, гадаад, дотоод бодлого, батлан хамгаалах бодлого зэрэг энэ асуудал нь эрх мэдлийн зөв тэнцвэрийг олсноор хэрэгжинэ гэсэн зүйлийг цөөн тооны зохих нэмэлтийг хийх хэрэгтэй. Мөн энэ хүрээнд хариуцлагын тогтолцоог нэмэгдүүлэхээр яригдаж байгаа. Тиймээс хэзээ өргөн барих, яаж хэлэлцэх вэ гэдгийг ярьж байна.
Төрийн байгуулалтын байнгын хорооны өнөөдрийн хуралдаанаар яаж хэлэлцэх вэ гэдгийг хэлэлцэж байна. Яаж өргөн барих гэдэг нь ажлын хэсгээс өргөн барихад бэлэн болсон” гэхэд Ж.Мөнхбат гишүүн “Үндсэн хуулийг өөрчлөх нь цаг үеийн шаардлага, нийгмийн цаг үеийн захиалгаар бий болсон асуудал. Хэвлэл мэдээллийн байгууллагууд Үндсэн хуулийг өөрчлөх цаг нь болсон талаар хөнддөг болсон байна. Герман, Франц, Английн Үндсэн хууль судлаачид ирсэн. Тэд аливаа Үндсэн хууль 15-20 жил үүргээ гүйцэтгэдэг. Үүний дараа шинэчлэл ордог талаар ярьж байсан. Манай улсын Үндсэн хууль 26, 27 жилийн өмнө батлагдсан. Нас бие хүрсэн 27 настай хүнд бага насных нь хувцсыг өмгөх гээд байгаатай адил байна” гэхэд Д.Лүндээжанцан гишүүн “Үндсэн хуулиа өөрчлөнө гэж яримааргүй байна. Үндсэн хуульд нэмэлт тодотгол гэж яримаар байна. Хэчнээн жил болсон ч Үндсэн хуулиа хэрэглэдэг жишээ бий. 200 настай Үндсэн хууль хүртэл байдаг. Бид Үндсэн хуульд нэмэлт оруулахдаа цөөн тооны чанартай өөрчлөлт оруулахаар анхаарлаа тавьж байна. Хүмүүс 40 гаруй нэмэлт өөрчлөлт оруулах санал хэлдэг. Гэхдээ Үндсэн хуульд нэмэлт оруулахдаа эрэмбэтэй, цаг хугацаатай, судалгаатай явагдах ёстой” гэлээ.
Р.Хишигжаргал
Сэтгэгдэл (1)