Нийслэлийн Засаг дарга бөгөөд Улаанбаатар хотын Захирагч С.Амарсайхан өнөөдөр Япон Улсаас Монгол Улсад суугаа Онц бөгөөд Бүрэн эрхт Элчин сайд Кобаяши Хироюкиг хүлээн авч уулзлаа. Уулзалтад Японы ЭСЯ-ны Улс төрийн хэлтсийн гуравдугаар нарийн бичгийн дарга Мураками Мэй, нийслэлийн Засаг даргын зөвлөх М.Мэнд-Очир, НЗДТГ-ын Гадаад харилцаа, хамтын ажиллагааны хэлтсийн дарга Д.Чинзориг нар байлцав.
Уулзалтын эхэнд хотын Захирагч С.Амарсайхан Монгол Улсыг сайн мэддэг, манай улсад чин сэтгэлээсээ элэгсэг дотно ханддаг, Японы шилдэг дипломатч Элчин сайдаар томилогдсонд баяртай буйгаа илэрхийлээд, цаашид Монгол, Японы стратегийн түншлэл, эдийн засгийн харилцааг өргөжүүлэхэд чухал нөлөөтэй болохыг онцлоод “Хоёр улсын хооронд стратегийн иж бүрэн түншлэлийн харилцаа худалдаа, эдийн засаг, хүмүүнлэг, боловсрол, соёл зэрэг олон салбарт өргөжиж байна. Цаашид Улаанбаатар хотын засаглалыг хөгжүүлж, чадварлаг боловсон хүчин бэлтгэх, аялал жуулчлалыг хөгжүүлэхэд түлхүү анхаарч ажиллах бодолтой байна” гэв.
Элчин сайд Кобаяши Хироюки хоёр улсын хамтын ажиллагааг өргөжүүлж ажиллахад бэлэн байна гээд “Цаашид хоёр орны худалдаа, эдийн засгийг хөгжүүлж экспортыг дэмжиж ажиллах шаардлагатай байна. Тиймээс бизнес эрхлэгчдийг дэмжих харилцан үр ашигтай ажиллах бодолтой байна” хэмээлээ.
Уулзалтын үеэр хотын Захирагч Улаанбаатар хотод өрнөж байгаа бүтээн байгуулалтын талаар дэлгэрэнгүй дурдаад цаашид хэрэгжүүлэх төсөл хөтөлбөрүүдэд ноён Кобаяши Хироюкиг санал ирүүлж харилцан үр ашигтай хамтарч ажиллахаар ярилцлаа.
Ташрамд дурдахад, Япон Улсаас Монгол Улсад суугаа Онц бөгөөд Бүрэн Эрхт Элчин сайд ноён Кобаяши Хироюки өнгөрсөн оны арванхоёрдугаар сарын 25-нд Ерөнхийлөгч Х.Баттулгад Итгэмжлэх жуух бичгээ өргөн барьсан юм. Тэрбээр, 1987-1989 он Япон Улсаас Монгол Улсад суугаа ЭСЯ-нд гуравдугаар нарийн бичгийн дарга, 2005-2008 онд ЭСЯ-ны Дэд тэргүүнээр тус тус томилогдон ажиллаж байжээ.
