АН-ын даргын төлөөх тэмцэх цаашид ч үргэлжлэх нь. Ц.Туваан, С.Эрдэнийг дэмжчигчид тус тусдаа хурлаа явуулж, намын даргад нэр дэвшигчдээ бүртгэж эхэллээ. Эндээс сонгогдсон хоёр даргын хооронд мөргөлдөөн бий болж, АН-ын дотоод маргаан мөд дуусахгүй бололтой.

Тодруулбал, АН-ын Дотоод сонгуулийн хорооноос намын даргын сунгааг энэ сарын 28-нд зохион явуулахаар болж, нэр дэвшигчдыг 4, 5-нд бүртгэсэн. Намын даргын уг сунгаанд 16 нэр дэвшигч анхлан бүртгүүлснээс дэнчингийн мөнгөө төлж, албан ёсны эрхээ авсан долоон хүний нэр яригдаж буй. Тодруулбал, нийслэлийн АН-ын дарга асан Д.Пүрэвдаваа, УИХ-ын гишүүн О.Цогтгэрэл, Ж.Батсуурь, гишүүн асан Ц.Оюунгэрэл, М.Тулгат, МҮХАҮТ-ын ерөнхийлөгч О.Амартүвшин, С.Эрдэнэболд нар намын даргын суудлын төлөө үзэхээр тус бүр 94 сая төгрөгийн дэнчингийн мөнгө Дотоод сонгуулийн хорооныхоо дансанд байршуулжээ. Уг дэнчингийн мөнгө 150 сая төгрөг хүрч болзошгүй гэсэн яриа бий.

Нэр дэвшигчдээсээ өндөр үнийн дүнтэй дэнчин авч өрсөлдүүлж байгаа энэ сунгаа нь Ц.Тувааны талынх аж.

Учир нь өчигдөр С.Эрдэнийн талых намын даргын сунгааг дахин зарлаж, энэ сарын 19-өөс нэр дэвшигчдээ бүртгэхээ мэдэгдсэн. Ингэхдээ нийслэлийн АН-ын даргад нэр дэвшигчийн дэнчин 25 сая, намын даргынх 35 саяын дэнчинтэй байхаар тогтсон хэмээн мөн Дотоод сонгуулийн хороо гээчээс нь мэдэгдэв. АН-д ийм л завхарсан үйл явдал болж, дэмжигч олон нь хэнд итгэхээ мэдэхгүй төөрөлдөж явна. Сүүлдээ намын даргын сунгаанд зарим нэр дэвшигчид нь хэнийх нь зарласан хуралдаан албан ёсных гэдгийг мэдэхээ байсан сурагтай.

Б.Лхам