Хөгжлийн банкны чанаргүй зээлийн талаарх “Өөрөөр нь төлүүлье” хэлэлцүүлэг өрнөж байна. Энэ үеэр МАН-ын ерөнхий нарийн бичгийн дарга Д.Амарбаясгалан мэдээлэл өглөө. Тэрбээр “Зөрчил гаргасан тохиолдолд улс төрийн хариуцлага хүлээдэг боломжийг нээлттэй болгож өгч байна. Улс төрийн хариуцлага хүлээвэл дараа дараагийн улс төрийн үйл ажиллагаанд орох боломж хаагдана.

Аливаа гэмт хэрэгт холбогдсон тохиолдолд улс төрийн намаас түдгэлзүүлнэ. Энэ нь өөрөө шүүхээр таслагдаад гэм буруутай нь тогтоогдвол намын харьяаллаас хасна. Ингэснээр насан туршдаа улс төрийн албан тушаал хасахгүй.

Хамгийн энгийнээр хэлбэл манай намын хувьд сумын иргэдийн хуралд ч нэр дэвшүүлэхгүй.  2020 оны сонгуульд орохдоо ядарсан, зүдэрсэн ард иргэдээ дэмжиж тэтгэдэг.  Мөн улс орныг эзэнгүй мэт аашилдаг хэсэг бүлэгтэй хатуу тэмцэнэ гэсэн зорилготой орсон.

Бид улс төр талаасаа харвал энэ хэлэлцүүлгийг бидэнд олдож байгаа завсрын боломж гэж харж байгаа. УИХ, Засгийн газар нэг зүгт харж ойлголцох боломж төдийлөн олддоггүй. Энэ олдсон боломжийг бид өнөөдөр өөрсдөдөө олдсон боломж гэж харахгүйгээр ард иргэддээ олдсон боломж болгох хэрэгтэй.

Энэ задарсан, дийлдэхээ байсан олон зүйлтэй тэмцэж, цэгцэд нь оруулахын төлөө болохгүйгээс болох хүртэл нь авч хэрэгжүүлнэ. Үүн дээр ард иргэд, иргэний нийгмийн байгууллага хамтран ажиллаасай хэмээн хүсэж байгаа юм. Үүний үр дүнд улс төрийн эрх мэдэл төвлөрсөн цөөн хэсгийн эрх мэдлийг сарниулах үйл ажиллагааг бодитой хийх зайлшгүй шаардлага ирсэн байна. МАН, АН гэсэн хоёрхон нам тогтолцоог бий болгочхоод бусад намуудын оролцох боломжийг хаадаг. Энэ зүйлийг задалж, сарниулахыг үндсэн зорилгоо болгон ажиллаж байна" гэлээ. 

Д.Батчулуун