Хөгжлийн банкны чанаргүй зээлийн талаарх “Өөрөөр нь төлүүлье” хэлэлцүүлэг өрнөж байна. Энэ үеэр Хууль зүйн дэд сайд Б.Солонгоо мэдээлэл хийлээ. Тэрбээр “Бид  мөрдөн шалгах ажиллагаанд хөндлөнгөөс оролцох боломжгүй. Энэ бол хуулиар хориглосон. Тийм учраас Хөгжлийн банкны зээлдэгчтэй холбоотой мөрдөн шалгах ажиллагаа хийгдэж байгаа талаар АТГ-аас өчигдөр мэдээлэл хийсэн. АТГ болон ЦЕГ, Эрүүгийн цагдаагийн алба гээд холбогдох хууль сахиулах байгууллагууд шаардлагатай ажиллагааг хийж байгаа гэж ойлгож байгаа. Засгийн газраас дэмжлэг үзүүлж ажиллах болохоос бид хөндлөнгөөс нөлөөлөх боломжгүй. Хөгжлийн банкны хувьд иргэдээс хадгаламж авч төвлөрүүлдэггүй. Арилжааны банкнаас ялгаатай. Төслийн санхүүжилтээ гадаадаас эх үүсвэр татдаг. Ирэх жил төлөгдөх 500 сая ам.долларын евро бонд 280 сая ам.доллартой тэнцэх хэмжээний иенийн бондын төлөлт хийгдэх ёстой. Тэгэхээр ирэх жил нийт 800 сая ам.долларын бондын төлөлт хийгдэх ёстой. Энэ төлөлтийн 280 сая ам.долларын самурай бонд нь Засгийн газрын баталгаатай гарсан байгаа. Энэ бондын өрийг Хөгжлийн банк гэрээгээр хүлээсэн үүргээрээ төлөх ёстой. Эргэн төлөлтийг Хөгжлийн банк өөрийнхөө эх үүсвэрээс төлөх үүрэг амлалт өгч гэрээ байгуулсан” гэв.