Америкийн дуучин, ая зохиогч Аарон Чарльз Картер өнгөрсөн бямба гарагт Калифорниа мужийн Ланкастер дахь гэртээ нас барсан байдалтай олдсон байна. Хөгжимчний карьераа өөрийн төрсөн ах болох Ник Картерын “Backstreet Boys” хамтлагийн бүрэлдэхүүнд багтан хэд хэдэн аялан тоглолт, концертод оролцож карьераа амжилттай эхэлж байсан тэрээр 2000-аад оны эхээр залуу үеийнхний дунд өөрийн поп дуунуудаараа шуугиан тарьж байв.

Мөн Картер долоон настайгаасаа уран бүтээлээ хийж эхэлсэн бөгөөд 1997 онд есөн настайдаа өөрийн нэртэй анхны цомгоо гаргаж, дэлхий даяар сая хувь борлогджээ. Сүүлд 2003 онд "Another Earthquake! " цомгоо гаргасан нь хамгийн их эрэлттэй цомгоор нэрлэгдэж байлаа. Картер Мелани Мартин хэмээх бүсгүйтэй сүй тавьж, 2021 онд Принс хэмээх охинтой болсон. Мөн тэр өөрийн ах Никтэй таарамжгүй харилцаатай байсан бөгөөд нэгэн удаа ахынхаа жирэмсэн эхнэрийг ална хэмээн сүрдүүлсэн хэргээр цагдаад дуудагдаж байжээ.

Мансууруулах бодис, эмийн хэрэгт ч холбогдож явсан, одоогийн 30-аад насныхны шүтээн тэрээр 35 насандаа хорвоог орхиж, шүтэн бишрэгчдийнхээ зүрхэнд гунигт дурсамж үлдээлээ.

Түүний ах Ник Картер сошиал хуудсандаа “Энэ мэдээг сонсоод сэтгэл минь өвдөж байна. Хэдийгээр бидний харилцаа таарамжгүй байсан ч түүнийг хайрлах хайр минь хөрөөгүй. Би түүнийг эрүүл, илүү амжилттай яваасай гэж үргэлж хүсдэг байсан. Даанч тэр минь үүрдийн амгаланг олоод явлаа. Хайртай шүү бяцхан дүү минь ” хэмээн бичжээ.

Л.Саяан