Милан–Кортина 2026 өвлийн олимпын наадамд оролцож буй Украины скелетоны тамирчин Владислав Гераскевич дайны үеэр амь үрэгдсэн эх орныхоо иргэдийн хөргийг дүрсэлсэн дуулга зүүсэнтэй холбоотойгоор Олон улсын олимпын хороо (IOC)-ноос хориг тавиуллаа. 27 настай Гераскевич Италийн Кортина хот дахь бэлтгэлийн үеэр тусгайлан чимэглэсэн дуулгаа өмсөж, олон нийтийн анхаарлыг татсан юм. Тэрбээр “Дуулган дээрх хүмүүсийн зарим нь миний найзууд байсан” хэмээн Reuters агентлагт ярьжээ.

Тус дуулганд Оросын Украинд довтолсны улмаас амь үрэгдсэн хүндийн өргөлтийн тамирчин Алина Перегудова, боксчин Павло Ищенко, хоккейчин Олексий Лохинов, жүжигчин, тамирчин Иван Кононенко, шумбагч, дасгалжуулагч Микита Кожубенко, буудлагын тамирчин Олексий Хаваров, бүжигчин Дарья Курдель нарын хөрөг багтсан байв. Гераскевич “Олимпын үеэр дайны талаарх анхаарлыг хадгална гэсэн амлалтаа биелүүлсэн” хэмээжээ. Тэрбээр өмнө нь 2018 оны Пёнчаны олимп, 2022 оны Бээжингийн олимпод оролцож, “Украинд дайн хэрэггүй” гэсэн уриа барьж гарч байсан юм.

Гэвч Олон улсын олимпын хороо Олимпын дүрмийн 50 дугаар зүйлийн 2 дахь хэсгийг үндэслэн уг дуулгыг тэмцээний үеэр хэрэглэхийг хоригложээ. Тус заалтад “Олимпын бүс, талбайд улс төр, шашин, арьс өнгөтэй холбоотой аливаа сурталчилгаа, үзүүлбэр хийхийг хориглоно” гэж заасан байдаг. Иймээс Гераскевичийн дуулгыг улс төрийн шинжтэй илэрхийлэл гэж үзэн, албан ёсны тэмцээнд ашиглах боломжгүйг мэдэгдсэн байна.

Украины Ерөнхийлөгч Володимир Зеленский уг үйлдлийг сайшааж, “Тэр бидний тэмцлийн ямар үнээр өрнөж байгааг дэлхий дахинд харуулсан” хэмээн Телеграм хуудсаараа дамжуулан бичжээ. Түүний хэлснээр, энэхүү үнэн бодит байдлыг спортын арга хэмжээнд “зохисгүй” эсвэл “улс төрийн” гэж нэрлэх ёсгүй аж. Ийнхүү спорт, улс төрийн заагийн талаар дахин маргаан өрнөж, олимпын үнэт зүйлсийн талаар олон нийтийн анхаарал дахин төвлөрөөд байна.