ЭШЛЭЛ 1
Монгол Улсын Ерөнхийлөгч У.ХҮРЭЛСҮХ: Энэ айлчлал нь БНСУ-ын төрийн тэргүүний 15 жилийн дараа Монгол Улсад хийж буй төрийн айлчлал бөгөөд хоёр орны харилцаа, хамтын ажиллагааны түүхэнд нэгэн шинэ хуудсыг нээсэн, онцгой ач холбогдолтой айлчлал болж байгааг онцлон тэмдэглэж байна.
ЭШЛЭЛ 2
Манай хоёр улс дипломат харилцаа тогтоогоод 36 жил болж буй хэдий ч хоёр орны ард түмэн өнө эртний түүхэн харилцаатай, ахан дүүсийн барилдлагатай, түүх, соёл, гарал үүслээрээ гүн гүнзгий холбоотой билээ.
ЭШЛЭЛ 3
Та бид манай хоёр улсын өнгөрсөн 36 жилийн ололт амжилтаа дүгнэн хэлэлцэж, “Стратегийн түншлэл”-ийн харилцааг улам бүр өргөжүүлэн хөгжүүлэхийн төлөөх “Хамтарсан тунхаглал” гаргалаа.
ЭШЛЭЛ 4
Айлчлалын хүрээнд эрүүл мэнд, боловсрол, байгаль орчин, хүнс, хөдөө аж ахуй, мэдээллийн технологи, соёл, спорт, аялал жуулчлал, тээвэр, логистик, геологи, ашигт малтмал, хот байгуулалт зэрэг салбарын хамтын ажиллагааны үндэс суурийг бэхжүүлсэн Засгийн газар болон байгууллага хоорондын 20 гаруй баримт бичигт гарын үсэг зурлаа.
ЭШЛЭЛ 5
Төрийн айлчлалын хүрээнд Улаанбаатар хотноо болох “Монгол-Солонгосын бизнес форум”-д 250 гаруй аж ахуйн нэгжийн төлөөлөл оролцож байгаа нь хоёр орны бизнес эрхлэгч, баялаг бүтээгчид хамтран ажиллах хүсэл эрмэлзэл дүүрэн байгааг илтгэж байна
ЭШЛЭЛ 6
БНСУ-ын Засгийн газрын дэмжлэгтэйгээр “Монгол, Солонгосын газрын ховор металлын хамтарсан судалгааны төв байгуулах” төсөл амжилттай хэрэгжиж байгааг тэмдэглэн хэлэхэд таатай байна.
ЭШЛЭЛ 7
Айлчлалын хүрээнд жолооны үнэмлэхийг харилцан зөвшөөрөх тухай хэлэлцээр, Консулын хэлэлцээр зэргийг байгуулсан нь иргэдийн эрх ашгийг хамгаалах, иргэд харилцан зорчих чиглэлд гарч буй том дэвшил болж байна.
ЭШЛЭЛ 8
Тэртээ 100 гаруй жилийн өмнө солонгос эмч И Тэ Жүн Нийслэл хүрээнд амьдарч байхдаа эмнэлэг нээж, монгол хүмүүсийг анагаан эмчилж байсныг Богд хаан үнэлэн, Тэргүүн зэргийн Эрдэнийн очир одон хүртээж байсан сайхан түүхийг өнөөдөр дурсахад таатай байна.
ЭШЛЭЛ 9
Энэ айлчлалаар бидний хэлэлцэж, тохиролцсон ажлууд Монгол, Солонгосын хөгжил цэцэглэлт, ард түмэн хоорондын найрамдал, нөхөрлөл, сайн сайхны төлөө биеллээ олж, хоёр улсын харилцаа, хамтын ажиллагаа улам бүр өргөжин хөгжинө гэдэгт итгэл төгс байна
ЭШЛЭЛ 10
“Тэрбум мод” үндэсний хөдөлгөөнд БНСУ-ын Засгийн газар, иргэд, аж ахуйн нэгж олноор нэгдэж, бодит хувь нэмэр оруулж ирсэнд гүнээ талархаж байна.
ЭШЛЭЛ 11
Монгол, Солонгосын харилцаа, хамтын ажиллагааг өргөжүүлэн хөгжүүлэх үйлсэд Эрхэм хүндэт Ерөнхийлөгч Таны оруулж буй хувь нэмэр, хичээл зүтгэлийг онцлон тэмдэглэж, өндрөөр үнэлж байна.
ЭШЛЭЛ 12
Манай хоёр ард түмний найрамдал, нөхөрлөл үеийн үед батжин бэхжиж, Монгол, Солонгосын найрсаг харилцаа, хамтын ажиллагаа өнө мөнхөд цэцэглэн хөгжих болтугай.
ЭШЛЭЛ 13
БНСУ-ын Ерөнхийлөгч И Жэ Мён:
ЭШЛЭЛ 14
Монгол Улс бол манай улсын үндэсний эрх ашигт суурилсан прагматик гадаад бодлогын чухал түнш орон бөгөөд БНСУ нь Монгол Улсын хамгийн итгэлтэй стратегийн хамтын ажиллагааны түнш юм. Энэ мессеж хоёр улсын ард иргэдэд сайн хүрээсэй гэж хүсэж байна.
ЭШЛЭЛ 15
Энэ удаагийн албан ёсны хэлэлцээний хамгийн том үр дүн бол хоёр улсын төрийн тэргүүн “Солонгос, Монголын харилцааны Алтан үе”-ийг хамтдаа нээх алсын хараагаа тодорхойлж, харилцааны цаашдын хөгжлийн чиглэлийг тусгасан Хамтарсан тунхаглал гаргасан явдал юм.
ЭШЛЭЛ 16
Энэ тунхаглал нь хоёр улсын өнгөрсөн 30 гаруй жилийн хугацааны нөхөрлөл, итгэлцэлд тулгуурлан ирээдүй цаг үеийг “Солонгос, Монголын харилцааны Алтан үе” болгон хөгжүүлэх чухал ач холбогдолтой болж байна.
ЭШЛЭЛ 17
Солонгос, Монгол хоёр улс нь энэ хамтарсан тунхаглалд суурилан хоёр орны ард иргэдийн ахуй амьдралыг дээшлүүлж, бүс нутгийн энх тайван, хөгжил цэцэглэлтэд хувь нэмэр оруулна гэдэгт итгэж байна.
ЭШЛЭЛ 18
Хоёр улс 2030 он гэхэд худалдааны эргэлтийг 1 тэрбум ам.долларт хүргэхийн төлөө хамтран ажиллана.
ЭШЛЭЛ 19
Эрүүл мэндийн салбарын хамтын ажиллагаа нь хоёр улсын иргэд шууд үр өгөөжийг нь мэдрэх боломжтой салбар. Иймээс “Хавдар судлалын үндэсний II төв” байгуулах төсөл зэргээр дамжуулан Монгол Улсын иргэдийн эрүүл мэнд, амьдралын чанарыг дээшлүүлэхэд хувь нэмэр оруулах болно.
ЭШЛЭЛ 20
Аялах, сурах, хөдөлмөр эрхлэх, соёлын солилцоо зэрэг чиглэлээр иргэдийн солилцоог эрчимжүүлж, “Иргэдийн солилцоог дэмжих хамтын ажиллагааны замын зураглал”-д тулгуурлан хоёр улсын иргэдийн эрх ашиг, харилцан ойлголтыг нэмэгдүүлэхийн төлөө хамтран ажиллах болно.
ЭШЛЭЛ 21
Хоёр улсын харилцааны чухал тулгуур болсон консулын салбарын хамтын ажиллагааг үргэлжлүүлэн бэхжүүлж, иргэдийн солилцоог илүү чөлөөтэй, идэвхтэй болгох орчин бүрдүүлнэ.
ЭШЛЭЛ 22
Монголын орчин үеийн анагаах ухааны хөгжилд хувь нэмэр оруулсан И Тэ Жүн зэрэг хоёр орны найрамдлын түүхэн өвийг хамтдаа дурсаж, өвлүүлэн үлдээх замаар ард түмний нөхөрлөл, итгэлцлийг улам бэхжүүлэх болно.
ЭШЛЭЛ 23
Олон улсын байгууллага, олон талт хамтын ажиллагааг өргөжүүлэх, Олон улсын шүүх зэрэг олон улсын байгууллагын сонгуулийн үйл явцад ч хамтран ажиллах болно.
ЭШЛЭЛ 24
Монгол Улсын Үндэсний их баяр наадамд би гэргийн хамт хүндэт зочноор оролцоно. Энэ нь Солонгос, Монголын харилцааны алтан үеийг угтан хоёр орны ард түмэн улам ойртон нэгдэх сайхан боломж болно гэж итгэж байна.
Сэтгэгдэл (14)