Соня Массиг гэрт нь буудан хөнөөсөн хэргээр 20 жилийн хорих ял эдэлж байсан Иллинойс мужийн Сангамон тойргийн шерифийн газрын экс орлогч Шон Грэйсон 32 насандаа шоронд нас баржээ. Түүний өмгөөлөгч Дэниэл Фулц энэ талаар наймдугаар сарын 23-нд мэдээлсэн байна. Гэхдээ нас баралтын шалтгааныг одоогоор тодруулаагүй байна. Грэйсон 2024 оны долдугаар сарын 6-нд 36 настай Соня Массиг буудан хөнөөсөн юм.
Масси гэрийнхээ гадна сэжигтэй хүн явж байна хэмээн 911-т дуудлага өгсөн бөгөөд Грэйсон өөр нэг цагдаагийн хамт түүний гэрт очжээ. Хэргийн үеэр Масси гал тогоондоо байсан бөгөөд зуухан дээрх халуун устай савыг авчээ. Тэрээр цагдаа нартай ярилцахдаа “Би чамайг Есүсийн нэрээр эсэргүүцэж байна” хэмээн хэлсэн байна. Үүний дараа Грэйсон түүн рүү буу тулгаж, халуун устай савыг тавихыг шаардсан байна. Масси уучлалт гуйж, гал тогооны тавцангийн ард нуугдах үед Грэйсон гурван удаа буудаж, нэг сум нь нүүрэн тус газар нь буужээ. Мэсси газар дээрээ нас барсан.
Хэргийн үеийн хамтрагч цагдаагийн биеийн камерт бичигдсэн дүрс олон нийтэд ил болсон нь АНУ даяар хүч хэрэглэсэн цагдаагийн ажиллагааны талаар хүчтэй шүүмжлэл, эсэргүүцэл дагуулсан юм. Хамт явсан цагдаа Досон Фарли шүүхэд мэдүүлэхдээ Массиг өөрт нь аюул учруулж байна гэж огт үзээгүй бөгөөд Грэйсон буугаа гаргасны дараа л өөрийн бууг гаргасан гэж хэлжээ. Грэйсон уг хэргээр эхлээд нэгдүгээр зэргийн хүн амины хэрэгт буруутгагдсан ч 2025 оны аравдугаар сард тангарагтны шүүх түүнийг хоёрдугаар зэргийн хүн амины хэрэгт гэм буруутайд тооцсон. Улмаар 2026 оны нэгдүгээр сард түүнд 20 жилийн хорих ял оноожээ.
Грэйсон Массиг буудсан хэргээсээ өмнө бүдүүн гэдэсний хорт хавдартай гэж оношлогдсон байсан бөгөөд өвчин нь элэг, уушгинд нь тархсан байжээ. Тэрээр хүнд өвчний улмаас ялыг гэрийн нөхцөлд эдлүүлэх хүсэлт гаргасан ч Иллинойс мужийн Хоригдол суллах зөвлөл өнгөрсөн долдугаар сард хүсэлтийг нь хүлээж аваагүй байна.
Массигийн гэр бүлийг төлөөлж байсан иргэний эрхийн хуульч Бен Крамп “Грэйсоны нас баралт Соняаг буцаан авчрахгүй. Соня Массигийн амь насыг хөнөөсөн үйлдэл ямар ч үндэслэлгүй байсан” хэмээн мэдэгджээ. Энэ хэрэг дараа нь Иллинойс мужид цагдаа ажилд авахдаа өмнөх ажлын түүхийг илүү нарийвчлан шалгахыг шаардсан “Sonya Massey Act” хууль батлагдахад нөлөөлсөн бөгөөд Сангамон тойргийн цагдаагийн байгууллагын үйл ажиллагаанд шинэчлэл хийхэд хүргэсэн байна.
Л.Баяр
