1980-аад оны хөгжмийн ертөнцийн хамгийн танил хоолойнуудын нэг, “Total Eclipse of the Heart” дуугаараа дэлхий даяар алдаршсан Уэльсийн дуучин Бонни Тайлер 75 насандаа таалал төгслөө. Түүний гэр бүлийнхэн дуучныг нас барсан тухай мэдээг албан ёсоор мэдээлсэн бөгөөд Бонни Тайлер Португалд эмчилгээ хийлгэж байх үедээ өөд болсон байна.
Бонни Тайлерын жинхэнэ нэрийг Гэйнор Хопкинс гэдэг байв. Тэрээр 1970-аад оноос хөгжмийн карьераа эхлүүлж, өвөрмөц сөөнгө хоолой, сэтгэл хөдлөлтэй дуулалтаараа бусдаас ялгарч байлаа.
Түүний хамгийн алдартай бүтээл болох “Total Eclipse of the Heart” 1983 онд гарч, дэлхийн олон орны хөгжмийн жагсаалтыг тэргүүлсэн юм. Энэ дуу нь түүний нэрийг дэлхийн хэмжээний од болгож, хөгжмийн түүхэнд үлдээсэн хамгийн том бүтээлүүдийн нэг болсон.
Мөн тэрээр “It’s a Heartache”, “Holding Out for a Hero” зэрэг хит дуунуудаараа олон сая сонсогчдын хайр хүндэтгэлийг хүлээсэн билээ. Бонни Тайлерын хоолойн өвөрмөц өнгө нь түүний уран бүтээлийн гол онцлог байв. Түүний сөөнгө, хүчтэй хоолойг рок болон поп хөгжмийн ертөнцөд давтагдашгүй хэв маяг гэж үнэлдэг байсан.
“Total Eclipse of the Heart” дууг алдарт хөгжмийн зохиолч Жим Стейнман бүтээсэн бөгөөд энэ бүтээл Бонни Тайлерт Грэммийн шагналд нэр дэвших зэрэг олон улсын томоохон амжилтыг авчирсан юм.
Тэрээр таван арван жилийн турш хөгжмийн тайзнаа идэвхтэй байсан бөгөөд 2013 онд Eurovision Song Contest тэмцээнд Их Британийг төлөөлөн оролцсон. Мөн хөгжмийн салбарт оруулсан хувь нэмрийг нь үнэлж Британийн эзэнт гүрний одонгоор шагнуулж байв. Бонни Тайлерын уран бүтээлүүд өнөөдөр ч дэлхийн өнцөг булан бүрт сонсогдсоор байна. Түүний хүчирхэг хоолой, сэтгэл хөдөлгөм дуунууд нь 1980-аад оны хөгжмийн бэлгэ тэмдэг болон үлдэж, олон үеийн сонсогчдын дурсамжид мөнхөрлөө.
Л.Баяр
