Ном, зохиолд шимтэгч хэн бүхэнд зориулан, амралтын өдрөөр уншихад тохиромжтой найман номын жагсаалтыг хүргэж байна. 

1.  Г.Г.Маркес – Зуун жилийн ганцаардал

Буэндигийнхний зургаан үеийн амьдрал ид шид, хувь тавилан, солиорол, улс төрийн үзэл баримтлал хийгээд зүүд, бодит амьдрал хоёрын аль нь болох нь мэдэгдэхээ болих санаанд оромгүй эргэлтүүд, хүний язгуур мөн чанарын илрэл зэрэг бичвэрийн сүлэлдээн уг зохиолын цөм болно. Уг бүтээл дэлхийн сонгодог уран зохиолын жагсаалтыг хэвлэгдсэн цагаасаа эхлэн түүчээлж, олон тайлал, таамаг дагуулсан сонгодог роман билээ. Хэрэв уншиж амжаагүй бол энэ зун таны заавал унших ёстой номын жагсаалтад бичигдэх учиртай юм.

2. Владимир Набоков – Лолита

Зохиолд дунд эргэм насны эр Гумберт аялж явахдаа нэгэн эмэгтэйн байшинд өрөө хөлслөн суудаг. Гумберт анхны хайраа золгүй байдлаар алдсанаас болж өсвөр насны залуу охидыг нууцхан хайрлах эмгэгтэй болсон байдаг. Ингээд эмэгтэйн гэрт толгой хорогдож түүний 12 настай бяцхан охин Лолитад сэтгэл алдарч нууцхан хүсэмжлэх болсноор зохиолын үйл явдал эхэлдэг. Зохиолч Владимир Набоковыг нэр алдарт хүргэсэн уг бүтээлийг уншихгүй өнгөрөөж болохгүй юм. “Лолита, амьдралын минь гэрэл гэгээ, биеийн минь халуун илч. Нүгэл хилэнц минь, амин сүнс минь. Лолита гэхэд хэл тагнай дээгүүр гурав алхаж, гурав дахь дээр нь шүдэнд тулна. Ло. Ли. Та.”

3. Л.Н.Толстой – Анна Каренина

Зохиолд гурван гэр бүлийн ээдрээтэй түүхийг харуулна. Орос оронд баримталж байсан үзэл бодол, нөхцөл байдлын хүлээсүүдийг хүний нийгмийн сайн, муу аль аль талаас нь хөндсөн учир гялалзсан амжилтыг авчирсан зохиол юм. Нөхөрт гарсан баян хатагтай Анна Каренинагийн жавхаалаг офицер Вронскийд өгсөн эмгэлэлт, нууц дурлалын түүхийг өөр нэгэн хос болох Константин Левин, Китти Щербацкая нарын аз жаргалтай, цэвэр ариун хайрын өнгөн дээр тод томруунаар ялган харуулна. Өнгөц харахад Аннагийн бүх зүйл бүтэмжтэй мэт, хэргэм язгуур өндөр эр нөхөр, хайрт хүү, эд хөрөнгө хийгээд ихэс дээдсийн хүрээлэлд өөрийн байр сууриа олсон гээд амьдралаас өөр юуг ч хүсэх вэ дээ гэмээр гял цал бууна. Гэвч сэтгэлийнх нь гүнд өчүүхэн гэмээр хоосон зай оршсоор ирсэн нь хайр сэтгэлийн аз жаргалд тэмүүлэх оргилуун хүслэн байлаа.

4. Харүки Мүраками- Эрэг дээрх Кафка

Эрэг дээрх Кафка бол Харүки Мүракамигийн ес дэх роман бөгөөд Японд 2002 онд анх худалдаанд гарчээ.
Энэхүү романы үйл явдал зохиолын гурван гол баатар болох Саэки-сан, Тамүра Кафка, Наката нарын амьдралыг даган гурван зэрэгцсэн шугамаар орон зайн хувьд харилцан адилгүй, өөр өөр орчин нөхцөлд өрнөдөг. Гэвч хувь заяаны эрхээр эсвэл тэдний эртнээс хүсэж байсан хүслээр, дур гутам зөгнөлийн биеллээс зугтаахаар сураг тасарсан ээж эгчийгээ хайхаар замд гарах өсвөр насны хүү Кафка Тамүра, бодит ертөнцтэй зэрэгцээ орших өөр нэг ертөнц рүү нэвтрэх хаалгыг хааж, энэ ертөнцийн хүмүүст тохиолдож буй сонин хачин явдлуудыг зогсоож, бүхнийг хуучин хэвд нь оруулахаар зөнгөөрөө зүтгэх муурын хэл ойлгодог, учир битүүлэг хөгшин Наката, өөрийнх нь ер бусын амьдралд цэг тавих хэн нэгнийг хүлээн өдөр хоногийг аргацаан өнгөрүүлэх, нууцлаг эмэгтэй Саэки нарын зам хүссэн хүсээгүй нэг цэгт огтлолцдог.

5. Харуки Мураками- Норвегийн ой

Японы орчин үеийн уран зохиолын онцгой нэгэн төлөөлөгч бол яахын арагүй Харуки Мураками юм. “Норвегийн ой” хэмээх роман нь гарсан даруйдаа Муракамиг дэлхий дахинаа алдаршуулж, зөвхөн Японд л гэхэд хоёр сая хувь борлогдож, түүний эл номыг тавиуртай залаагүй сэхээтэн гэр бүл байгаагүй гэлцдэг.
Энэ зохиолд амьдралд хөл тавьсан нэгэн залуугийн амьдрал, хайр сэтгэл болоод хүмүүний нандин харилцааны тухай өгүүлнэ.

6. Харуки Мураками- Эмсгүй эрс

…Эмсгүй эрсийн зовлон шаналлыг гагцхүү Эмсгүй эрс л ойлгоном. Тэнд очсон хүн өрнийн салхины таатай сэвэлзээг арван дөрөвтэй оршихуйнхаа хамт үүрд алдана. Усан цэргүүдийн сулхан гингэнээн чихнээ хадна. Тэнгисийн ёроол дахь аммониты, целакант нүднээ үзэгдэнэ. Шөнийн нэг цагт хүн рүү залгана. Шөнийн нэг цагт танихгүй дуудлага авна. Хэн нэгнийг хаа нэгтээ ойшоох, болихоо шийдэж чадалгүй хүлээн сууна. Дугуйныхаа хийг шалгаж байтал нулимс тань хар аяндаа зам дээр дусагнана…

7. С. Анудар- 4 биш 4

С.Анудар өнөөгийн бидний амьдралын бодит үнэнийг идеалист гүн ухааны үүднээс сэтгэн мэдэрч өөрийнхөө товч тодорхой, өвөрмөц аргаар дүрсэлжээ. Түүний зохиолын гол баатрууд бол амьдралд дуртай, маш хүмүүнлэг, цэвэр ариун, чөлөөт амьдралыг мөрөөдөгсөд юм. Тус зохиол нь өвөрмөц уран сайхны хэлбэртэй авангард рок зохиолын төрөлд ойр болно
“Над руу зочид ирдэг. Зочид – сэтгэлийн байдлууд. Гуниг. Жаргал, тэд нарын танилууд, бүх юм. Хаалга тогшиж орж ирдэг, хаалга эвдэж ирдэг. Миний хаалга бөх цоожтой, эвдэх аргагүй. Хэн ч ирсэн би дургүйцдэггүй. Тэд адил. Бүх юм. Хэнийг ч урих хэрэггүй. Урилга байдаггүй, тэд ч байхгүй. Өөрсдөө ирдэг. Би хүлээж л байна. Чи цай уу. Явсных нь дараа аяга угаах дургүй. Тавигдсан газраа байж байг. Бүх юм байх ёстой газартаа. Чи цай уу. Тэд нарыг орж гарахад би дуртай. Нэг дургүй юм бол тэд нар явдаггүй. Явсан ч үлддэг. Би тэд нартай цуг амьдардаг байх. Бүгдээрэнтэй нь. Бүх юм. Хааяа харагдахаа больдог ч гэсэн, байгаа нь, ирэх нь, дандаа мэдрэгддэгТэд хаашаа ч явдагггүй. Тэд нар нэг нэгнийгээ хучдаг, алдаг, дараа нь сэхдэг, заримдаа өөрөөр. Хамаа алга. Мэдэхгүй. Би ганцаараа үлдмээр байна.”

8. М.А.Булгаков – Нохойн зүрх

“Нохойн зүрх” тууж бол Булгаковын хамгийн дуулиантай, маргаантай, этгээд бүтээлүүдийн нэг юм. Профессор Филипп Филиппович Преображенскийгийн нохойд хүний өнчин тархи суулгах туршилт хийж ямар үр дүнд хүрсэн тухай эл тууж өгүүлнэ. Зохиолд гарч байгаа 1920-иод оны Москва хотын барилга, гудамжны нэр бодит төдийгүй тэр үед гарч байсан театр, циркийн үзүүлбэрүүд ч жинхэнэ аж. Этгээд бичлэг, зохиолчийн ур чадварыг шавхсан энэхүү бүтээл танд уран дүрслэл ямар хүчтэй илэрхийлэмж болохыг мэдрүүлэх болно.

Ж.Саяан