Прокурорын байгууллагын үйл ажиллагааны ил тод, нээлттэй байдлыг хангах, Эрүүгийн болон Зөрчлийн хуульд заасан аливаа хэргийн талаар олон нийтэд мэдээлэхэд анхаарах асуудлын хүрээнд сэтгүүлчдийг чадавхжуулах зорилгоор жил бүр зохион байгуулдаг "ПРОКУРОР-СЭТГҮҮЛЧ" сургалт зургадугаар сарын 22-ны өдөр боллоо.
Энэ удаагийн сургалтыг “Авлига, албан тушаалын гэмт хэргийн онцлог” сэдвийн хүрээнд зохион байгуулж, сэтгүүлчдэд дараах сэдвүүдээр хичээл заалаа. Үүнд,
- Авлигын гэмт хэргийн талаар мэдээлэх арга зүй,
- Авлигын гэмт хэргийг мөрдөн шалгахад гардаг хүндрэл, бэрхшээл, онцлог,
- Прокурор төр, нийтийн ашиг сонирхлыг хамгаалах нь,
- Авлигын гэмт хэрэгт шүүхээс оногдуулж буй эрүүгийн хариуцлага гэсэн сэдвүүдээр судалгаа баримтад үндэслэн сонирхолтой байдлаар заасан нь сэтгүүлчдэд өндөр сэтгэгдэл үлдээв.
Сургалт, судалгааны хүрээлэнгийн хяналтын прокурор Б.Өнөрмаа авлигын гэмт хэргийн талаар сэтгүүлчид мэдээлэхдээ судалгаа нотолгоонд үндэслэсэн, бүх нийтэд тэгш ойлголт өгөхөөр, тухайн сэдвийн дагуу бүрэн дүүрэн мэдээлж байхыг анхаарах хэрэгтэй, мөн аливаа гэмт хэргийн хохирогчийг хамгаалах тал дээр анхаарахыг онцолж байсан бол, Шүүхэд төрийг төлөөлөх хэлтсийн ахлах прокурор Ш.Одонсүрэн прокурорын зүгээс төр, нийтийн ашиг сонирхлыг хамгаалахад хэрхэн оролцох, бусад улсуудын хувьд энэ тал дээр ямар үйлчилгээ үзүүлдэг гэхчлэн прокурор зөвхөн хяналт явуулах биш үүргийн хүрээнд төр, нийтийн ашиг сонирхлыг хамгаалдгийг олон талаас нь тайлбарлав.
Нийслэлийн прокурорын газрын Шүүхэд төрийг төлөөлөх хэлтсийн дарга, ахлах прокурор Х.Батчимэг авлигын гэмт хэрэгт шүүхээс оногдуулж буй эрүүгийн хариуцлагын талаар танилцуулж, тухайн гэмт хэргийн шийдвэрлэлтийн байдал, сүүлийн гурван жилийн хугацаанд үйлдэгдсэн авлигын гэмт хэргийн гаралтыг товч танилцуулаад хууль хэрэгжүүлэхэд учирч буй зарим саад бэрхшээлийг онцоллоо.
АТГ-ын Мөрдөн шалгах хэлтсийн албаны дарга, ахлах комиссар Ч.Жаргалбаатар авлигын гэмт хэргийг мөрдөн шалгахад гардаг хүндрэл, бэрхшээл, онцлогийг тайлбарлаж, аливаа гэмт хэргийн цөм рүү харж, судалж бичихийг анхаарууллаа. Мөн мэргэжилтнүүдийн хэлж байгаагаар авлигын гэмт хэрэг нь олон янзын аргаар үйлдэгдэж, ихэвчлэн далд хэлбэрээр болдог тул гэмт хэргийг нотлоход урт хугацаа шаардлагатай ажээ. Сургалтын төгсгөлд сэтгүүлчдээр зохиомол хэрэг дээр тулгуурласан багийн ажил хийлгэсэн нь энэхүү бэрхшээлийг ойлгоход чухал нөлөө үзүүлсэн юм.
Улс орны хөгжилд хамгийн том саад учруулагч бол яах аргагүй АВЛИГА, АЛБАН ТУШААЛЫН ГЭМТ ХЭРЭГ билээ. Жилээс жилд тоо нь нэмэгдэж буй авлигын хэргийг нотлон шийдвэрлэхэд хүний нөөц, ажиллах хүчний боломж бага байдгийг мөн анхаарууштай. Эрх мэдэл, албан тушаалаа урвуулан ашиглаж нийтийн эрхийг зөрчиж, боломжоос нь хумсалсаар, улс орны хөгжил дэвшилд нөхөж баршгүй гарз хохирол учруулдаг “авлига”-тай хэн бүхэн тэмцэхийн учир аливаа асуудлыг олон талаас нь харж, нягталж, хянаж, шаардах нь хамгийн чухал арга хэлбэр билээ.
