"Найман ишигний" гэх тодотголтой малын хулгайн хэргийг давж заалдах шатны шүүх хурал өнөөдөр буюу наймдугаар сарын 2-ны өдөр 10.00 цагт Хэнтий аймгийн шүүхийн Тамгын газрын байранд эхэлж, дөрөв орчим цаг үргэлжилсэн юм. Шүүгчид гурван цаг орчим хуралдсны эцэст дараах шийдвэрийг гаргалаа.

Давж заалдах шатны шүүх хурлын үйл явц

Шүүх хуралд хохирогчийн тал шүүх хуралдаанд оролцсонгүй. Харин шүүгдэгч Л.Гэрэлзаяа, Ц.Төмөр, өндөр настан Б.Даариймаа нар оролцлоо. 

"Олон тооны мал бүлэглэн хулгайлсан хэргийн нийт хохирол 2 сая 690 мянган төгрөг" гэж тодорхойлсныг шүүгч танилцуулав.

Өмгөөлөгч, шүүгдэгч Төмөрийг өөрийн малаа мэдэхгүй, ялгахгүйгээс үүдэн бүх малыг нэг будгаар будсан гэх үйлдэлд дүгнэлт хийхийг шүүгчдээс хүсэв. 

Хэрэг болон ял оногдуулсан байдлын тухай 

Шүүгдэгч нарыг олон тооны малыг бүлэглэн хулгайлах гэмт хэрэг үйлдсэн буруутайд тооцож, 2 жил 6 сар болон хоёр жилийн хорих ял оногдуулсан. Эрүүгийн хуульд бүлэглэн мал хулгайлсан тохиолдолд 2-8 жилийн хугацаанд зөвхөн хорих ял шийтгэнэ гэж заасан. Үүний дагуу шүүхээр шийдвэрлэсэн ба хорихоос өөр ял төлөвлөх боломжгүй гэж ШЕЗ-ийн Шүүгчийн хараат бус байдал, хууль ёсны ашиг сонирхлыг хамгаалах албанаас мэдэгдсэн байна.  

Давж заалдах шатны шүүхийн шийдвэр

Хэдийгээр прокурорын зүгээс хэрэг тусгаарлах талаар гаргасан санал дүгнэлт байгаа боловч шүүгдэгч нарт холбогдох энэ хэргийг бүхэлд нь тал бүрээс нь бүрэн бодитой хянан шийдвэрлэхийн тулд шүүгдэгч Даариймаад холбогдох хэргийг тусгаарлахгүйгээр шийдэх нь Эрүүгийн хэрэг хянан шийдвэрлэх тухай хуульд нийцнэ гэж үзэн тогтоолыг хүчингүй болгон шийдвэрлэж, хэргийг дахин хэлэлцүүлэхээр анхан шатны шүүхэд буцааж байна гэв.

Б.Даариймааг цагаатгахдаа Л.Гэрэлзаяа нарын мэдүүлэгт үндэслэсэн нь хангалтгүй гэж үзэв.

Хэргийг анхан шатны шүүхэд буцааж байгаатай холбогдуулан таслан сэргийлэх арга хэмжээг "Хувийн баталгаа гаргах" таслан сэргийлэх арга хэмжээгээр өөрчлөн шийдвэрлэлээ. 

Ингэснээр шүүгдэгч Б.Гэрэлзаяа, Х.Төмөр нарыг дахин шүүх хурал болтол суллаж байгаа юм. 

 

М.Жаргал