Өчигдөр буюу энэ сарын 7-ны өдөр БЗД-ийн 25 дугаар хороо Натур орчимд буун дуу гарсан гэх мэдээлэл цахим сүлжээгээр тархаад буй. Энэ талаар ЦЕГ-аас мэдээлэл хийлээ.
Цагдаагийн байгууллагын тусгай дугаарын утсанд наймдугаар сарын 07-ны өдрийн 21.00 цагийн орчимд БЗД-ийн зургадугаар хорооны нутаг дэвсгэрт байрлах цахим тоглоомын газарт "хүн бусдад хутгалууллаа" гэсэн дуудлага мэдээлэл ирсэн. Тус дуудлагын дагуу цагдаагийн байгууллагаас эрэн сурвалжлах ажлыг шуурхай зохион байгуулж, 40 минутын дараа Бөхийн өргөөний хажууд байрлах 22 дугаар байрнаас саатуулан шалгажээ.
Шалгалтын явцад 39 настай иргэн Б нь 33 настай иргэн У-г хутгалаад хэргийн газраас зугтсан гэдгийг тогтоосон. Этгээдийг саатуулах явцад биедээ хутга авч явсан, өөрийн болон бусдын амь насанд аюул учруулахаар үйлдэл хийсэн учраас цагдаагийн байгууллагаас албаны тусгай хэрэгсэл (резинэн сумтай буу) ашигласан байна.
Тухайн иргэн хоёр гартай хутгатай, гараа хутгатайгаа нааж, скочидсон байсан. Улмаар өөрийгөө болон бусдын амь насанд аюул учруулах үйлдэл гаргасан байна. Цагдаагийн албан хаагчид хутгаа тавихыг ярилцан шаардсан ч "Би шийдсэн" хэмээн шаардлагыг хүлээн аваагүй тул цагдаагийн байгууллагаас хүч нэмэгдүүлэн очиж, хэлэлцээр хийсэн.
Хэлэлцээрт тухайн иргэн цагдаагийн байгууллагын биелүүлэх боломжгүй зүйлийг хүссэн тул цагдаагийн байгууллага албаны тусгай хэрэгсэл ашиглажээ. Тухайн иргэн нь 5 удаагийн ял шийтгэлтэй байжээ.
Тухайн этгээд бага насны хүүхэдтэйгээ уулзах хүсэлт тавьсан. ЦЕГ-аас хүүхэдтэй нь уулзуулж болно, гэхдээ гартаа байгаа жижиг болон балиус хутга, мөн халаасандаа байгаа хутгаа тавихыг шаардсан ч хүлээж аваагүй байна.
Мөн ээжийг нь, гэр бүлийнх нь хүнийг уулзуулахыг хүссэн ч тухайн этгээд хүлээж аваагүй. Зөвхөн бага насны хүүхэдтэйгээ уулзана гэжээ. Тиймээс дайчлан баривчилсан. Дайчлан баривчилсны дараа ээж болон гэр бүлийнх нь хүнтэй уулзуулж, тухайн этгээдийн биед ямар нэгэн хохирлыг цагдаагийн байгууллагаас учруулаагүй болохыг биечлэн танилцуулжээ.
Сэтгэгдэл (1)