Хүүхдийн зуслангийн ээлжийн хуваарь болон төлбөрийн мэдээллийг нийслэлийн Хүүхэд, гэр бүлийн хөгжил, хамгааллын газраас танилцуулсан. Энэ зун 23 зуслан үйл ажиллагаа явуулах бөгөөд амрах хоногоосоо шалтгаалж 290 мянган төгрөгөөс 1.4 сая төгрөгийн төлбөртэй байна.

Энэ талаар нийслэлийн Хүүхэд, гэр бүлийн хөгжил, хамгааллын газраас тодруулснаар 23 зуслангийн гурав нь буюу "Найрамдал", "Баянгол", "Тэмүүлэл" улсынх бол бусад нь хувийн өмчийн зуслан юм.

Тэгвэл 2024 онд үйл ажиллагаа явуулж байгаа хөгжлийн бэрхшээлтэй хүүхэд хүлээн авах боломжтой хүүхдийн зуслангийн газрын мэдээллийг Хөгжлийн бэрхшээлтэй хүний хөгжлийн ерөнхий газраас мэдээллээ.

Энэ зун улсын хэмжээнд 23 зуслан үйл ажиллагаа явуулахаас хөгжлийн бэрхшээлтэй хүүхэд хүлээн авах боломжтой 11 зуслан байна.

Монгол Улсын хэмжээнд өнөөдөр нийт 55 зуслан бүртгэлтэй байдаг. Үүнд төрийн өмчит зургаан зуслан, орон нутгийн өмчит 10, хөдөлмөр зуслан зургаа, орон нутгийн өмчит үйлдвэрийн газрын харьяа зуслан дөрөв, байгууллага, аж ахуйн нэгжийн харьяа хоёр, хувийн өмчит 28 зуслан байна. Өнгөрсөн 2023 онд 43 зуслан үйл ажиллагаа явуулж, 73964 хүүхэд зуслангийн хөгжлийн хөтөлбөрт хамрагджээ.