Засгийн газрын энэ сарын 28-ны өдрийн ээлжит хуралдаанаар Л.Мөнхтүшигийг Гадаад харилцааны яамны Төрийн нарийн бичгийн даргаар томилсон.

ЗГХЭГ-ын дэд дарга Б.Батцэцэг тус яаманд хүрэлцэн ирж, Засгийн газрын тогтоолыг танилцуулснаар Л.Мөнхтүшиг үүрэгт ажилдаа оров. Тус яамны газар, нэгжийн удирдлагууд шинээр томилогдсон Төрийн нарийн бичгийн дарга Л.Мөнхтүшигт ажлын амжилт хүсэв.

Тэрбээр 2007 онд БНХАУ-ын ГХЯ-ны харьяа Гадаад харилцааны их сургуулийг дипломат мэргэжлээр төгссөн. 2016 онд Бээжингийн их сургуулийн Хуулийн сургуулийг эрх зүйч мэргэжлээр магистрын зэрэг хамгаалсан. 2008 оноос тус яамны Ёслолын хэлтэс, Гэрээ, эрх зүйн газарт атташе, 2011-2014 онд Монгол Улсаас Швед Улсад суугаа ЭСЯ-нд атташе, консул, гуравдугаар нарийн бичгийн дарга, 2014-2016 онд ГХЯ-ны Гэрээ, эрх зүйн газарт хоёрдугаар нарийн бичгийн дарга, 2016-2021 онд Консулын газрын дэд захирал, захирал, 2021 оноос 2024 оны зургаадугаар сар хүртэл Монгол Улсаас БНХАУ-д суугаа ЭСЯ-ны Дэд тэргүүн бөгөөд Элчин зөвлөхөөр ажиллаж байсан мэргэжлийн дипломат. Тэргүүн Шадар цолтой.