Ардчилсан намын “4:11 мэдээллийн цаг” хэвлэлийн бага хурлын үеэр УИХ-ын гишүүн Х.Тэмүүжин дараах мэдээллийг өглөө.

Тэрээр:“Ардчилсан намаас дэвшүүлж байгаа үзэл санаа нь нэг хүнд зориулсан зүйл биш. Парламентын спикер гэдэг нэр яагаад гарсан бэ гэхээр, парламентын дарга өөрөө ярих биш, харин гишүүдийг яриулж, тэдний дуу хоолойг түгээдэг хэрэгсэл гэж анх нэрлэгдсэн. Спикер өөрөө дуугардаггүй, харин хуралдааны дэгийг сахиулж, бусдыг яриулж тусалдаг хүн.

Мэтгэлцээнийг тал алдалгүй шүүж дэмждэг, төлөөллөө хэрэгжүүлэх тэнцвэрийг хадгалдаг, талцлаас ангид, нам улс төрөөс бие даасан парламентын ёсыг хамгаалагч.

Монголчууд бид УИХ-ыг даргатай болгосон. Гэтэл зарим хүн дарга гэдгээ андуурч, өөрийгөө УИХ-ын бүх гишүүнийг төлөөлөх мэтээр эндүүрдэг. Парламент бол Засгийн газар биш. Засгийн газар нь Ерөнхий сайд, сайд нараас бүрддэг бөгөөд тэдгээрийг томилдог, захирдаг. Харин парламент нь 126 гишүүнтэй, тэнцвэртэй эрх бүхий байгууллага. Спикер болсон ч тэр бүх гишүүний дарга гэсэн үг биш. Парламентын үндсэн үүрэг нь төлөөлөх, хууль тогтоох, хянахад оршдог.

Ардчилсан намын бүлгээс санаачлан мэтгэлцээнийг оруулж ирсэн. Намын лидерүүд хоорондоо бодлогоороо өрсөлдөж мэтгэлцэх, асуулгын цагтай болох боломж бүрдсэн. Гэтэл тэр мэтгэлцээг нэг намын дарга шүүгээд зохицуулна гэдэг байж болохгүй. Парламентын олонх, цөөнхийн үйл ажиллагааг тэнцвэртэй явуулахын тулд хоёр зүйл шаардлагатай: төвийг сахих, бие даасан байх. Хэрвээ төвийг сахиж чадахгүй, бие даасан байдал алдагдвал парламент давамгайлагч буюу олонхын талд үйлчилдэг парламент болж хувирна” гэв.