Монголын уудам тал нутгаас Солонгос жуулчдад хүрэх гүүр болсон “АНОР ТИ ЭНД ТИ” ХХК-ны гүйцэтгэх захирал, хөтөч тайлбарлагч Энх-Амгалангийн Энхболдтой ярилцлаа. 

-Юуны өмнө та өөрийгөө танилцуулна уу?

-Сайн байцгаана уу , та бүхэндээ энэ өдрийн мэнд хүргэе. Намайг Энх-Амгалангийн Энхболд гэдэг. МУИС-ГГФ-ыг хайгуулын геологич мэргэжилтэй төгссөн, “ АНОР ТИ энд Ти “ ХХК-ны гүйцэтгэх захирал, Солонгос хэлний мэргэжлийн хөтөч тайлбарлагч байна. Би аялал жуулчлалын салбарт хөтөч тайлбарлагч, аяллын маршрут хөтөлбөр зохион байгуулан энэхүү салбарт ажиллаж байна.

-Анх Солонгос жуулчдыг Монголд аялуулах санаа хэрхэн төрсөн бэ?

-Би 2013-2021он хүртэл Өмнөд Солонгос улсын Иксан хотын Вонгванг Их сургуульд эхнэрийн хамт суралцаж, ажиллаж амьдарсан. Тэр хугацаанд Солонгос хүмүүс манай улсыг их сонирхож асуудаг байсан л даа. Түүнээс хойш л Монгол орны өргөн уудам тал нутаг, хосгүй өвөрмөц тогтоц бүхий байгалийн гайхамшгийг үзүүлэн тайлбарлаж өгөх мөрөөдөлтэй болсон.

Манай компани 2022 онд “АНОР ТИ ЭНД ТИ” нэртэйгээр байгуулагдсан. Бид Солонгос жуулчдыг Монгол орны үзэсгэлэнт байгаль, өвөрмөц тогтоц бүхий бүс нутгуудаар аюулгүй, тав тухтай аялуулах зорилготой ажиллаж байна. Сүүлийн хоёр жилд үйл ажиллагаагаа илүү идэвхжүүлж, зах зээлдээ тогтвортой байр суурь эзлэхээр зорин ажиллаж буй старт-ап компани байгаа.

-Солонгос жуулчдад Монгол Улс юугаараа онцгой санагддаг вэ?

-Монгол Улс бол Солонгос жуулчдын хувьд өдөр тутмын амьдралаас тэс өөр орон зай. Хотжилт ихтэй, хүн амын нягтрал өндөр орчноос ирсэн жуулчдад Монголын уудам тал нутаг, нам гүм байгаль, цэнгэг агаар жинхэнэ амралт болдог.

“Үзүүр нь үл харагдах тал нутаг, хязгааргүй хөх тэнгэр яг л зураг мэт санагдлаа” гэсэн сэтгэгдлийг олон жуулчдаасаа сонсож байсан.

-Монголын байгаль, соёл, уламжлалаас жуулчид хамгийн их сэтгэгдэл төрүүлдэг зүйл нь юу байдаг вэ?

-Юуны өмнө Монголын тал хээрийн хязгааргүй уудам орон зай жуулчдад онцгой мэдрэмж төрүүлдэг. Тухайлбал Говийн уудам цөл, Хөвсгөл нуурын тунгалаг ус, Горхи-Тэрэлжийн байгалийн цогцолборт газрын өвөрмөц хад чулуу зэрэг байгалийн тогтоц жуулчдад гүн сэтгэгдэл үлдээдэг.

Мөн нүүдэлчдийн ахуй соёл хамгийн их гайхширал төрүүлдэг юм билээ. Монгол гэрт хонох, морь унах, айраг амсах, малчны хотонд зочлох нь зүгээр нэг үзвэр биш, харин амьд соёлтой шууд харьцаж буй мэдрэмжийг өгдөг.

-Жуулчдын хувьд Монголд аялах хамгийн тохиромжтой улирал нь ямар улирал байдаг вэ?

-Монголд аялах хамгийн тохиромжтой улирал бол зун, ялангуяа 6-8 сарууд. Энэ үед цаг агаар дулаахан, байгалийн өнгө үзэмж үгээр хэлэхийн аргагүй гайхалтай, хөдөө орон нутгаар аялахад таатай нөхцөл бүрддэг.

Мөн 7-р сард Нүүдэлчин Монголчуудын уламжлалт хамгийн том болох “Үндэсний их баяр наадам” болдог учраас монголын олон соёл, уламжлалыг нэг дороос сонирхох боломжийг олгодог. Намар байгаль шаргалтан үзэсгэлэнтэй боловч шөнөдөө сэрүүсдэг, харин өвөл, хаврын аялал тусгай бэлтгэл шаарддаг.

-Гадны жуулчдын хувьд аяллын хөтөлбөр маш чухал байдаг. Та бүхэн аяллын хөтөлбөрөө хэрхэн гаргадаг вэ?

-Манай хөтөлбөр жуулчдын сонирхол, хэрэгцээнд тулгуурлан уян хатан зохион байгуулагддаг. Бид зөвхөн үзвэрийн газраар явах бус тухайн нутгийн ахуй, амьдралын хэв маягийг бодитоор мэдрүүлэхэд анхаардаг. Мэргэжлийн хөтөч тайлбар, найдвартай тээвэр, аюулгүй байдлыг нэгдүгээрт тавьж ажилладаг. Ингэснээр аялагч бүрд тав тухтай, дурсамжтай аяллыг бий болгохыг зорьдог. Аялал бол нэг талаараа амралт учраас тухайн аялагчдад зориулан хөтөлбөрүүдээ нарийн зохион байгуулж бэлддэг.

-Тэгэхээр яг Солонгос жуулчдадаа зориулсан тусгай үйлчилгээ бий юу? (солонгос хэлтэй хөтөч, хоол, тохирсон маршрут гэх мэт)

-Тийм ээ, Солонгос жуулчдад зориулсан тусгай үйлчилгээ бий. Манай компани нь Солонгос хэлний мэргэжлийн сургалтанд хамрагдсан хөтөч тайлбарлагч, мэргэшсэн жолооны үнэмлэхтэй, жуулчин тээврийн зөвшөөрөлтэй автомашин зэргээр аяллын турш соёл, түүхийг ойлгомжтой, сонирхолтой байдлаар хүргэдэг. Мөн Солонгос жуулчдын хоолны сонголтод мэдээж халуун ногоо болон хүнсний ногооны олон төрлийн сонголтыг заавал оруулдаг. Дараачийн бидний зайлшгүй анхаарах асуудал буюу ариун цэврийн нөхцөлийг онцгой анхааран ажилладаг.

-Аяллын үеийн тээврийн хэрэгслийн аюулгүй байдал, жуулчдын амь нас, тав тухыг хангах тал дээр танай компани ямар бодлого баримталдаг вэ?

-Тэгэлгүй яахав. Аялагчдынхаа амь нас, аюулгүй байдал бол нэн тэргүүн тавих ёстой. Бид юуны өмнө тээврийн хэрэгслийн техникийн бүрэн бүтэн байдлыг тогтмол шалгаж, даатгал болон жуулчны тээврийн зөвшөөрлийг бүрэн хангадаг. Жолооч, хөтөч нар нь туршлагатай, осолгүй жолоодлогын дадалтай бөгөөд аяллын маршрут бүрийг урьдчилан судалж, замын нөхцөлд тохируулан зохион байгуулдаг. Тав тухын хувьд 16 хүний суудалтай, цэвэр тохилог Toyota Hiace автомашинаар үйлчилж, агааржуулалт, суудлын зай, ачааны багтаамжийг жуулчдын хэрэгцээнд нийцүүлэн бэлтгэдэг. Мөн аяллын явцад ундны ус, амралтын зогсолт, шаардлагатай үед анхны тусламжийн хэрэгсэл зэргийг бүрэн хангаж ажилладаг.

-Анх удаа Монголд ирж буй жуулчдад ямар төрлийн аяллыг санал болгодог вэ?

-Анх удаа ирж буй жуулчдад байгаль, соёл хосолсон тойм аяллыг санал болгодог.

Юуны өмнө Улаанбаатар хотын аяллаар эхэлж, музей, сүм хийд, орчин үеийн амьдралтай танилцуулна. Дараа нь Хонгорын элс, Ёлын ам, Баянзаг зэрэг байгалийн алдартай бүс нутгаар аялна. Нүүдэлчин айлд зочилж, уламжлалт цагаан идээний бүтээгдэхүүнээс танилцуулж, ахуй соёлтой танилцуулах нь жуулчдад хамгийн их сэтгэгдэл төрүүлдэг. Хэрэв аяллын хугацаа нь 7-р сард таарвал Үндэсний их баяр наадмыг үзүүлэхийг зорьдог. Ингэснээр богино хугацаанд Монголын онцлогийг бүрэн мэдрэх боломжтой болдог.

-Таны хувьд хамгийн дурсамжтай, сэтгэлд үлдсэн түүхээсээ хуваалцаж болох болов уу?

-Бололгүй яахав. Миний хувьд бүх л аяллаасаа дурсамж, шинэ туршлагыг олж суралцдаг. Тэдгээрээс хамгийн сүүлд Говь, хангайн бүс нутгийг хамарсан 12 хоногийн аялал сэтгэлд минь онцгой дотно үлдсэн. Хос жуулчидтай хамт уудам говиос эхэлж, Сэлэнгийн мөрний хөвөөнд өндөрлөсөн урт аялал байлаа. Арван хоёр хоногийн турш бид нэг гэр бүлийн ахан дүүс мэт дотно уур амьсгалтай, нэгэн сэтгэл зүрхээр аялсан.

Хөтөч тайлбарлагч миний хувьд энэ аялал зүгээр нэг ажил биш, харин хэзээ ч мартагдашгүй, гайхамшигтай бас тодорхой хэмжээнд сорилт болсон өдрүүд байсан. (инээв)

-Өмнө ирж байсан жуулчдаас дахин ирсэн тохиолдол бий юу?

-Одоогоор яг ижил жуулчин дахин ирсэн тохиолдол хараахан байхгүй байна. Гэхдээ манайхаар аялсан жуулчид өөрсдийн гэр бүл, найз нөхөд, ажлын хамт олондоо манай аяллыг санал болгож, тэднийг илгээсэн тохиолдол цөөнгүй бий. Миний хувьд энэ нь дахин ирэхээс дутахгүй үнэтэй үнэлгээ. Жуулчин өөрийн ойр дотнын хүнд санал болгож байна гэдэг бол үйлчилгээ, аюулгүй байдал, зохион байгуулалтад итгэл хүлээлгэж буйн илэрхийлэл гэж бодож байна.

-Цаашид Солонгос аялагчдадаа ямар шинэ адал явдал, аяллыг нэвтрүүлэхээр төлөвлөж байна вэ?


-Бид Солонгосын зах зээлд зориулан Монгол орны зүүн бүс нутгийн байгалийн гайхамшгийг танилцуулах шинэ аяллуудыг хөгжүүлж байна. Жишээлбэл, “Энерги тур” нэртэй аялалд Улаанбаатар хотоос эхлэн Дорноговийн Хамрын хийдэд өндөрлөх, зүүн ба зүүн өмнөд талын говийн бүсийг дамнасан маршрут багтаж байгаа.

Мөн сүүлийн жилүүдэд Солонгос жуулчдын ихээхэн сонирхож буй Монголын хойд бүсээр дамжин, ОХУ-ын нутагт байрлах Байгаль нуурыг зорих олон улсын хосолсон маршрут боловсруулан ажиллаж байна.

-Солонгос жуулчдад хандаж юу хэлэх вэ, ямар амлалт өгч чадах вэ?

-Юун түрүүнд манай Монгол улс бол байгалийн онгон дагшин үзэсгэлэнт тогтоц, нүүдэлчин өв соёлыг тээж буй төв азийн сүүлчийн улс. Тиймээс таны аялал бидний соёл, байгаль, найрсаг зочломтгой байдлыг мэдрэх сайхан боломж байх болно. Бид аялал бүрийг аюулгүй, тав тухтай, мартагдашгүй сайхан дурсамж болгохын төлөө ажиллах болно гэж амлаж байна. (инээв)

Т.Зузу