Интерполын “Хөх булант” зар мэдээгээр олон улсын хэмжээнд эрэн сурвалжлагдаж байсан “Б”-г 2026 оны 05 дугаар сарын 04-ний өдөр Бүгд Найрамдах Солонгос Улсаас албадан гарган, Монгол Улсад шилжүүлэн авчирч, мөрдөн шалгах ажиллагааг үргэлжлүүлж байна.
Тус этгээд нь 2025 онд цахим орчин ашиглан бага насны хүүхдүүдтэй холбоо тогтоож, садар самуун агуулгатай мэдээлэл түгээсэн, мөн бэлгийн шинжтэй үйлдэлд уруу татаж, бэлгийн харьцаанд орох санал тавьсан гэх хэрэгт холбогдон шалгагдаж байсан юм.
Монгол Улсад шилжүүлэн авчрах ажиллагааг Цагдаагийн ерөнхий газрын Интерполын Үндэсний төв товчоо, Улсын ерөнхий прокурорын газар, Хууль зүй, дотоод хэргийн яам, Гадаад харилцааны яам болон Бүгд Найрамдах Солонгос Улсын Интерполын байгууллагатай хамтран зохион байгууллаа.
Цагдаагийн байгууллагаас гадаад улсад оргон зайлж, олон улсын хэмжээнд эрэн сурвалжлагдаж буй этгээдүүдийг олж тогтоох, Монгол Улсад шилжүүлэн авчрах ажиллагааг тогтмол хэрэгжүүлж байна. Иймд эрэн сурвалжлагдаж байгаа иргэдийг сайн дураараа эх орондоо ирж, хууль хяналтын байгууллагатай хамтран ажиллахыг анхааруулж байна.
Т.Зузу
