Сэлэнгэ аймгийн Засаг дарга Н.Лхагвадоржийн санаачилгаар 2025 оноос “Нутгийн оюутан” хөтөлбөрийг хэрэгжүүлж эхлээд байна. Тус хөтөлбөрийн хүрээнд Сэлэнгэ аймагт эрэлттэй, тэргүүлэх мэргэжлээр суралцах хүсэлтэй оюутнуудад дэмжлэг үзүүлж, орон нутагт шаардлагатай боловсон хүчнийг бэлтгэх зорилгоор ажиллаж байна.
Жил бүр 35 оюутанд тус бүр 5 сая төгрөгийн сургалтын дэмжлэг олгох бөгөөд хөтөлбөрт хамрагдсан оюутнууд төгсөөд орон нутагтаа 5 жилийн хугацаанд ажиллах гэрээ байгуулан суралцах юм. Мөн “Нутгийн оюутан” хөтөлбөрийн хүрээнд гадаадын их, дээд сургуулиудад оюутан сургах, тэтгэлэгт хөтөлбөрүүдэд хамруулах ажлыг үе шаттай хэрэгжүүлж байна.
Одоогийн байдлаар Бүгд Найрамдах Солонгос Улсын Бусан хотод 18 оюутан суралцаж байгаа бөгөөд цаашид хамтын ажиллагаатай улс орнуудад оюутан сургах ажлыг тогтмол зохион байгуулж байна юм.
Түүнчлэн БНСУ-ын Сөүл хотын “Самёок” их сургуулийн удирдлагууд Сэлэнгэ аймагт хүрэлцэн ирж, ерөнхий боловсролын сургуулийн төгсөгчид болон сурагчидтай уулзалт зохион байгуулж байна. Уулзалтын үеэр тус сургуулийн сургалтын орчин, мэргэжлийн чиглэл, тэтгэлэгт хөтөлбөр болон гадаадад суралцах боломжийн талаар дэлгэрэнгүй мэдээлэл өгч ажиллаж байгаа юм.
Энэхүү хөтөлбөр нь Сэлэнгэ аймгийн хөгжилд шаардлагатай хүний нөөцийг бэлтгэх, залуучуудыг эх орон, орон нутагтаа ажиллаж амьдрах боломжийг нэмэгдүүлэхэд чухал ач холбогдолтой хөтөлбөр болж байна.
