“Сүхбаатар-Нэг мөрөөдөл” ТББ, “Судар эгшиглэн” төсөл, Сүхбаатар аймгийн ЗДТГ-аас хамтран “Сүхбаатар боловсролын форум-2026”-г зохион байгуулж байна. Энэ удаагийн форумд Сүхбаатар аймгийн нутгийн удирдлага, боловсролын байгууллага, багш сурган хүмүүжүүлэгчид, сурагчид, ТББ, хувийн хэвшлийн төлөөлөл, МУ-д боловсролын үйл ажиллагаа явуулж буй гадаадын хөрөнгө оруулалттай компани, сайн дурынхан гэх мэт нийт 300 орчим зочид, төлөөлөгчид оролцож байна.
УИХ-ын гишүүн У.Отгонбаяр: Кембрижийн хөтөлбөртэй сургуулийг орон нутагтаа байгуулах нь боловсролын чанарыг сайжруулах, хүүхэд залуусыг дэлхийн стандартын мэдлэг, чадвартай болгох чухал алхам гэж би хувь хүний хувьд үздэг. Ийм сургуулийг зөвхөн хот суурин газар бус, орон нутагт хүртээмжтэй байдлаар хөгжүүлэх шаардлагатай.
УИХ-ын гишүүн Ж.Батсуурь: Боловсролоос ангид хүн гэж байхгүй. Багш нарын багшийг бэлтгэх, тэднийг чадавхжуулах асуудлыг онцгойлон анхаарах шаардлагатай байна. Мөн багш нарыг орон сууцжуулах бодлого, сургуулиудын ээлжийн ачааллын асуудал зэрэг тулгамдсан асуудлуудыг шийдвэрлэх хэрэгцээ зайлшгүй хөндөгдөж байна.
УИХ-ын гишүүн асан, АН-ын дэд дарга Н.Ганибал: Сайн багш нарыг нутагтаа авчиръя, байгаа багш нараа илүү чадавхжуулъя, тэдний орон сууц, нийгмийн баталгааны асуудлыг бодитоор шийдье. Багшийн хөгжил, тогтвортой ажиллах орчин бүрдсэнээр боловсролын чанар дээшилж, сум, аймгийн төвийн сургуулиудын ялгаа багасна.
Аймгийн Засаг Дарга М.Идэрбат: Хүүхдүүд нь байргүй багталцахгүй байхад “Боловсролын газар” том байшингаар яахав дээ. Хуучин аудитын газрын байр суларч байгаа тул боловсролын газар тийшээ орж байраа нэгдүгээр сургуульд суллаж өг гэсэн чиглэл өгөөд байна.
Аймгийн Боловсролын газрын дарга Ж.Түвшинжаргал: 2026-2027 оны хичээлийн жилд Сүхбаатар аймгийн төвийн сургуулиуд гурван ээлжээр хичээллэх хэмжээнд хүрсэн. Үүнтэй холбоотойгоор багш нарын хүртээмж, сурагчдын сурч хөгжих эрхийн асуудал улам бүр тулгамдаж байна. Мөн 2025 онд манай аймгаас орос хэлний хичээлээр ЭЕШ өгөх сурагч байгаагүй нь тухайн хичээлийн багшийн хүртээмж, сургалтын чанар, сурагчдын сонголттой холбоотой гэж харж байна.
“Сүхбаатар боловсролын форум-2026” арга хэмжээг ивээн тэтгэгчээр Дарьганга зочид буудлын хамт олон болон “Ди Жи Фрэйндс” компанийн ТУЗ-ийн дарга Г. Чинтөмөр нар ажиллаж байна.
Мөн Сант сургуулийн захирал, доктор З.Энхмөнх, Сэжон интернэйшнл компанийн захирал Mr. Hong Sung Ok, Электрон жаал сургуулийн захирал, боловсрол судлаач Э.Энхпүрэв нар хүрэлцэн ирээд байна.
