Godzilla vs. Kong болон Godzilla x Kong: The New Empire кинонд Жиа охины дүрийг бүтээсэн сонсголын бэрхшээлтэй жүжигчин, Техасын Сонсголын бэрхшээлтэй иргэдийн сургуулийн сурагч Кэйли Хоттл Мэрилэнд мужид болсон автомашины ослоор нас баржээ. Тэр 18 настай байсан.

Түүний эцэг болон сургууль нь Кэйлигийн нас барсан тухай мэдээллийг баталжээ. Кэйлигийн эцэг Жошуа Хоттл охиныхоо талаар Facebook-ээр дамжуулан бараг 23 минутын шууд бичлэгт мэдэгдсэн байна. Түүний ээж Кэци Хоттл мөн дохионы хэлээр бичлэг хийж, охиндоо эмгэнэл илэрхийлжээ. Кэйли 2026 оны долдугаар сарын 21-ний өглөө Мэрилэндийн Фредерик хотын орчимд гарсан нэг автомашины осолд өртсөн байна. Цагдаа, түргэн тусламжийнхан шөнийн 03:00 цагийн өмнөхөн ослын газарт очжээ.

Урьдчилсан мэдээллээр, 1995 оны Honda Accord автомашиныг 19 настай эрэгтэй жолоодож явсан бөгөөд замаас гарч, ус зайлуулах хоолойн байгууламж мөргөсөн байна. Цагдаагийн байгууллага осолд хэт өндөр хурд нөлөөлсөн байж болзошгүй гэж үзэж байгаа аж. 

Машинд нийт гурван хүн зорчиж явсан бөгөөд жолооч нь амь насанд аюулгүй гэмтэл авч эмнэлэгт хүргэгдсэн байна. Харин өөр нэг зорчигч эмнэлгийн тусламж авахаас татгалзжээ. Кэйлиг гэмтлийн төвд хүргэсэн боловч эмнэлэгт хүрэх замдаа нас барсан байна.

Кэйли Хоттл 2021 оны Godzilla vs. Kong кинонд Жиа хэмээх өнчин, сонсголын бэрхшээлтэй охины дүрээр олонд танигдсан. Тэр кинонд Жиа Конгтой дохионы хэлээр харилцаж, аварга биетэй Конгтой онцгой холбоо тогтоодог. Тэр мөн 2024 оны Godzilla x Kong: The New Empire кинонд дүрээ дахин бүтээсэн бөгөөд удахгүй гарах What Doesn’t Kill Us кинонд тоглохоор төлөвлөж байжээ.

Л.Баяр