Зарим жүжигчин нэг дүрээрээ алдаршдаг. Харин зарим нь тэр дүрээсээ салж чадсанаараа жинхэнэ жүжигчин гэдгээ баталдаг. Даниэл Редклифф бол энэ хоёрын зааг дээр өөрийн замыг зоригтойгоор гаргасан уран бүтээлч юм.
Тэрбээр 1989 оны долдугаар сарын 23-ны энэ өдөр Английн Лондон хотын Фулхэм дүүрэгт мэндэлжээ. Эцэг нь утга зохиолын агент, эх нь жүжигчдийн сонгон шалгаруулалтын агент байсан тул кино, театрын ертөнц түүнд огт танихгүй орчин байгаагүй. Гэвч хүүг нь нэг л өдөр дэлхий даяар мэдэх болно гэдгийг тэр үед хэн ч төсөөлөөгүй биз.
Даниэл анх 10 настайдаа Чарльз Диккенсийн “Дэвид Копперфильд” зохиолоос сэдэвлэсэн телевизийн бүтээлд тоглож, мэргэжлийн жүжигчний гараагаа эхлүүлжээ. Удалгүй “The Tailor of Panama” кинонд тоглосных нь дараа түүний амьдралыг бүхэлд нь өөрчлөх боломж ирсэн юм. Тэр боломжийн нэр нь Харри Поттер байлаа.
2001 онд “Харри Поттер ба Гүн ухааны чулуу” кино дэлгэцнээ гарахад Даниэл Редклифф дөнгөж 11 настай байв. Тэр өдөр дэлхий нийтэд нэгэн шинэ од мэндэлсэн мэт болсон юм. Нүдний шилтэй, духан дээрээ сорвитой, хар үстэй бяцхан хүү богино хугацаанд кино урлагийн хамгийн танил дүрүүдийн нэг болжээ.
Гэхдээ Харри Поттерын дүрийг бүтээсэн нь зөвхөн алдар нэр авчирсангүй. Энэ нь Редклиффын хувьд арван жил үргэлжилсэн асар том сорилт байв. Тэрdээр 2001-2011 оны хооронд “Харри Поттер”-ын найман кинонд тоглож, үзэгчдийн нүдэн дээр хүүхдээс насанд хүрсэн жүжигчин болж өссөн юм. Түүний хүүхэд насны дурсамж, өсвөр нас, анхны хайр, алдар нэрийн дарамт гээд амьдралынх нь хамгийн чухал жилүүд камерын өмнө өнгөрчээ.
Харин кино цуврал дуусахад Редклифф хамгийн том сорилттойгоо нүүр тулсан. Учир нь дэлхий нийт түүнийг Даниэл Редклиффээс илүү Харри Поттер гэж хардаг байв. Тэр энэ дүрээсээ зугтаахын оронд өөрийгөө дахин шинээр бүтээхээр шийджээ.
2007 онд Лондоны тайзнаа “Equus” жүжигт тоглохдоо тэр үзэгчдийн төсөөлж байснаас тэс өөр, хүнд драмын дүр сонгосон. Дараа нь Бродвейн “How to Succeed in Business Without Really Trying” мюзикл, “The Cripple of Inishmaan”, “The Lifespan of a Fact” зэрэг жүжгүүдэд тоглон, зөвхөн киноны од биш, тайзны жүжигчин гэдгээ харуулсан юм.
Түүний тайзны карьерын хамгийн том амжилтуудын нэг нь 2023 онд ирсэн. “Merrily We Roll Along” мюзиклд бүтээсэн дүрээрээ Даниэл Редклифф “Тони” шагналын мюзиклийн туслах дүрийн шилдэг жүжигчин төрөлд түрүүлсэн нь түүний жүжигчний ур чадварыг театрын ертөнц албан ёсоор хүлээн зөвшөөрсөн мөч байв.
Гэхдээ Редклиффын сонгосон дүрүүд үргэлж олны таашаалд нийцэхүйц, аюулгүй сонголт байсангүй. “The Woman in Black” кинонд аймшгийн жанраар тоглож, “Swiss Army Man”-д ер бусын дүр бүтээж, “Guns Akimbo”, “Imperium”, “Jungle” зэрэг өөр өөр өнгө аястай бүтээлүүдээр өөрийгөө нэг л дүрээр хязгаарлагдахгүй гэдгийг харуулсан.
Түүний тухай сонирхолтой нэг зүйл бол дэлхийд хамгийн алдартай дүрүүдийн нэгийг бүтээсэн ч өөрөө тэр дүрийнхээ яг эсрэгээр, хошин шогийн мэдрэмжтэй, өөрийгөө хэт нухацтай авч үздэггүй хүн гэдгээрээ танигдсан явдал юм. “Харри Поттер”-ын дараа тэр өөрийгөө зориудаар олон янзын, заримдаа бүр этгээд дүрүүдэд сорьж байв. Ингэснээр тэр нэг дүрийн сүүдэрт үлдсэн хүүхдийн од биш, өөрийн замыг бүтээсэн жүжигчин болж чадсан юм.
Даниэл Редклиффын түүх бол шидтэний тухай үлгэр биш. Харин нэгэн хүүхэд дэлхийн хамгийн алдартай дүрүүдийн нэгийг бүтээснийхээ дараа өөрийнхөө нэрийг тэр дүрээс салгаж, өөрийгөө дахин дахин шинээр нээсэн тухай юм.
Өнөөдөр дэлхийн олон хүн түүнийг хараад л “Харри Поттер” гэж танина. Гэхдээ Даниэл Редклиффын хамгийн том амжилт нь магадгүй энэ биш. Харин үзэгчдэд “Би зөвхөн Харри Поттер биш” гэдгийг олон жилийн турш бүтээлээрээ харуулж чадсан явдал юм.
37 жилийн өмнө Лондонд төрсөн бяцхан хүү өнөөдөр тайз, дэлгэцийн өөрийн гэсэн өнгө аястай жүжигчин болжээ. Түүний гарт шидэт саваа байхаа больсон ч кино урлагт үлдээсэн мөр нь Харри Поттерын ид шидээс дутахааргүй урт үргэлжилж байна.
Л.Баяр
