Олон улсын хөлбөмбөгийн холбоо (FIFA) дэлхийн аварга шалгаруулах тэмцээн болон бусад томоохон тэмцээний арилжааны эрхийг удирдах шинэ компани байгуулахаар төлөвлөж буй нь Европын хөлбөмбөгийн холбоо (UEFA)-гийн ширүүн эсэргүүцэлтэй тулгараад байна. ФИФА-гийн ерөнхийлөгч Жанни Инфантино "FIFA Forward Enterprise" (FFE) нэртэй шинэ байгууллага байгуулах санал дэвшүүлжээ. Энэхүү компанийн нийт үнэлгээг ойролцоогоор 20 тэрбум ам.доллар байхаар тооцож байгаа бөгөөд 20 хүртэлх хувийг нь хувийн хөрөнгө оруулагчдад худалдаалснаар 4.2 тэрбум ам.долларын хөрөнгө босгох зорилготой аж.
ФИФА-гийн тайлбарласнаар, уг хөрөнгөөр дэлхийн 211 гишүүн холбоонд дэд бүтэц, хүүхдийн болон нийтийн хөлбөмбөгийг хөгжүүлэх санхүүжилтийг нэмэгдүүлэх бөгөөд ирэх жилүүдэд холбоо бүрт олон сая ам.долларын дэмжлэг үзүүлэх боломж бүрдэх юм. Мөн шинэ компани нь зөвхөн арилжааны үйл ажиллагааг хариуцах бөгөөд тэмцээний дүрэм, зохион байгуулалт, шийдвэр гаргах эрх бүрэн ФИФА-д үлдэнэ гэж онцолжээ.
Гэвч UEFA энэхүү төлөвлөгөөг эрс шүүмжилж, "хөлбөмбөгийн сүнсийг худалдах гэсэн оролдлого" хэмээн тодорхойлсон байна. Европын холбооны үзэж буйгаар, ДАШТ зэрэг дэлхийн хамгийн нэр хүндтэй тэмцээнийг хөрөнгө оруулалтын хэрэгсэл болгох нь спортын үндсэн үнэт зүйл, бие даасан засаглалыг алдагдуулах эрсдэлтэй аж.
Шүүмжлэгчид мөн хувийн хөрөнгө оруулагчид ашиг орлогоо нэгдүгээрт тавьснаар ирээдүйд тэмцээний хуваарь, зохион байгуулалт, арилжааны бодлогод шууд бус нөлөө үзүүлэх вий гэсэн болгоомжлол илэрхийлж байна. ФИФА үүнийг няцааж, гаднын хөрөнгө оруулагчид ямар ч спортын болон удирдлагын шийдвэр гаргах эрхгүй байхыг дахин мэдэгдсэн юм.
Энэ санаачилга нь Инфантино 2018 онд Японы SoftBank-ийн оролцоотойгоор хэрэгжүүлэхийг оролдсон ч бүтэлгүйтсэн 25 тэрбум ам.долларын хөрөнгө оруулалтын төсөлтэй төстэй гэж ажиглагчид үзэж байна.
FFE байгуулах асуудлыг ФИФА-гийн зөвлөл болон 211 гишүүн холбоо хэлэлцэх бөгөөд эцсийн шийдвэр хараахан гараагүй байна. Гэхдээ энэхүү санал нь дэлхийн хөлбөмбөгийн удирдлагын хоёр том байгууллага болох ФИФА, UEFA-гийн хоорондын зөрчлийг улам хурцатгаж, ирээдүйн ДАШТ-үүдийн удирдлага, санхүүжилтийн талаар томоохон маргаан өрнүүлэх эхлэл болоод байна.
Л.Баяр
