Узбек улсын Ташкент хотод үргэлжилж байгаа ДАШТ-ний эрэгтэй 61, 65, 74, 97 кг-ын жингүүдийн барилдаан өчигдөр болж манай 4 бөх барилдсан. Үүнээс 61 кг-ын жинд олон улсын хэмжээний мастер Э.Ням-Очир, 65 кг-ын жинд Гавьяат тамирчин Г.Мандахнаран нар тэмүүлэл, зориг төгс барилдаж хүрэл медаль хүртэж спорт сонирхогчид, бөхчүүд, дасгалжуулагчид, шүүгчдээ магнай тэнийтэл баярлууллаа.
     Э.Ням-Очир хоёрдугаар тойрогт ираны бөх, ДАШТ-ний хүрэл медальт, азийн аварга Масуд Исмаилпуртай барилдаж 0:2, 0:5 оноогоо ялагдахдаа хөлд явсан ч түүний оноо болгож чадахгүй байсаар дийлдсэн. Ноднин жил мөнгө, хүрэл медалийн төлөө барилдаж байхдаа мөнгөн медалийн төлөө барилдаан ялагдаж байсан дэлхийн аварга Владимир Дубовыг дагах барилдаанд 3:0, 6:2 онооны харьцаагаар буулган авч даагаа нэхэж хүрэл медалийн төлөө казахстаны бөх Артас Санаатай барилдаж 1:1 онооны харьцаагаар ялж дэлхийд данстай бөх боллоо. Өнгөрсөн жилийн дутуугаа энэ жил гүйцээлээ. ДАШТ-нээс монголын эрэгтэй бөхчүүдийн хүртсэн 16 дахь хүрэл медалийн эзэн боллоо.
   
    Г.Мандахнаран өнөө цагийн эрэгтэй багийнхаа тэргүүлэгч бөх гэдгээ дахин нотлон харууллаа. Хоёрдугаар тойрогт армяны бөх, дэлхийн аварга Дэвид Сафаряныг оноогоор цэвэр ялж ялангуя хүрэл медалийн төлөө барилдаанд беларуссын бөх, Азамат Нуриковт эхний үед 6 оноо алдсан ч хоёрдугаар үед түүнийгээ нөхөн гүйцэж ялах асар их тэмүүлэлтэй бөх хэрхэн барилдаж амжилтанд хүрдэгийг үзүүллээ.

    Д.Хүдэрбулга маш сайн барилдаж өнгөрсөн жил энхий тойрогт ялагдаж байсан бол энэ жил 4 барилдаан хийж хоёр ялж азербайжан, гүржийн ур чадвар илүү, чац өндөртэй бөхчүүдтэй эн тэнцүү үзэн өвдөг шороодсон ч ойрын жилүүдэд чих дэлдийлгэх бөх гэдэг нь илт мэдэгдлээ. Аливаа амжилт нь тухайн бөхийн төдийгүй дасгалжуулагч, багийн хамт олон, мэргэжлийн холбоо, спортод элэгтэй хүмүүсийн хамтын хөдөлмөр, зүтгэл, сэтгэлийн үр дүн байдаг болохоор Д.Хүдэрбулгын хувьд төдийгүй манай хүнд жингийн бөхчүүдийн хувьд дотоодын өрсөлдөөн, бэлтгэл хангагч нарын асуудал амин чухал болох нь энэ тэмцээнээс дахин ойлгогдлоо.

    Өнгөрсөн жил манай 2 эрэгтэй бөх медалийн төлөө 4 барилдаан хийж 1 медаль авч байсан бол энэ удаа 3 бөх 4 барилдаан хийж 2 хүрэл медаль авлаа. Багийн дүнгийн хувьд өнгөрсөн жилийн амжилтаа ахиулж дараа онд Эрэгтэй багуудын дэлхийн цомын төлөө тэмцээнд оролцох эрхийг хоёр дахь жилдээ дараалан өвөртөллөө. ДАШТ-нд бөхчүүдээ сайтар бэлтгэж оролцуулсан эрэгтэй үндэсний шигшээ багийн ахлах дасгалжуулагч Гавьяат тамирчин Ц.Цогтбаяр, дасгалжуулагч Б.Баяраа, Л.Энхбаяр, Гавьяат тамирчин О.Пүрэвбаатар нарт талархлаа дэвшүүлж байна.
    Дөрөвдүгээр тойрогт АНУ-ын бөх, дэлхийн хошой болон олимпийн аварга Жордан Баррауз оросын бөх, дэлхийн хошой аварга Денис Царгушт 0:9 онооны харьцаагаар ялагджээ. Хоёрдугаар тойрогт АНУ-ын бөх, олимпийн аварга, ДАШТ-ний хүрэл медальт Жейк Вагнер украиний бөх, олимпийн мөнгөн медальт Валерий Андрейцевт 3:5 онооны харьцаагаар ялагдсан бол дөрөвдүгээр тойрогт ираны бөх, дэлхийн хошой аварга Реза Яздани туркийн бөх Шамиль Эрдоганд 0:8 онооны харьцаагаар хожигджээ.
    Энэ удаагийн ДАШТ-нд оросын бөхчүүд 5 алт, 1 хүрэл медаль авч дээд амжилт тогтоолоо. Найман жингийн 2 жинд хуучин, 6 жинд нь шинэ аварга төрж өрсөлдөөн улам хүчтэй болж байгааг харууллаа.