Тэд өмнө нь хэзээ ч ингэж нэгдэж байсангүй. Биологичид, гэрэл зурагчид, сэтгүүлчид, баримтат киноныхон нэгдэж "Байгаль, зэрлэг амьтан хамгаалах үндэсний нийгэмлэг" байгуулжээ... Чихэнд хоногшсон эдгээр үгсээр “Хүрээлэн. Амьд ертөнц цуврал" та бүхэнтэй мэндчилсээр багагүй хугацаа өнгөрчээ. Монгол орны зэрлэг амьтдын гэрэл зураг, дүрс бичлэгийн сан бүрдүүлэх зорилготой “Хүрээлэн” төсөл өнгөрсөн жилээс хэрэгжиж эхэлсэн бөгөөд энэ оны босгон дээр анхны нэвтрүүлгээ цацаж байв. Энэ хугацаанд 24tsag.mn сайт төслийн мэдээллийн ивээн тэтгэгчээр ажиллаж, тэдний хүнд хэцүү аялалын үр шим болсон гайхамшигт гэрэл зургуудыг оновчтой тайлбаруудын хамт хүргэж ирсэн билээ.

Хэдхэн хоногийн өмнө “Хүрээлэн. Амьд ертөнцийн цуврал"  Монголын сэтгүүл зүйн шилдэг бүтээлд олгодог Балдорж шагналын тэргүүн байрыг хүртсэн бөгөөд  бид энэхүү баярт үйл явдлыг тохиолдуулан "Хүрээлэн" төслийн шилдэг гэрэл зургуудыг хүргэхээр бэлтгэлээ. Ингээд гэрэл зургийн гайхамшиг,  амьд байгалийн адал явдлыг хамтдаа сонирхоцгооё.