Манлайллын түүчээ болсон “Улс төрд шинэ манлайлагч” төслийн шилдэг оролцогчид болох “Шинэ ялалт” багийн залуус өөрсдийн хэрэгжүүлж байгаа төслийн нээлтээ өнөөдөр Цусны төвд хийлээ. Дэлхий нийтийн судалгаанаас харахад гурван хүн тутмын нэгэнд амьдралынхаа явцад цус сэлбэх хэрэгцээ гардаг байна. Манай улсын хэмжээнд цусны нөөц нь анхаарах ёстой асуудлын нэгт зүй ёсоор багтдаг тул залуус сайн дураараа цус хандивлах хүмүүнлэгийн арга хэмжээг ийнхүү зохион байгуулжээ. “1 донор – 3 амьдрал” сайн үйлсийн аянд төслийн шилдэг 90 залуус, сайн дураараа хамрагдаж буй залуус болон олны танил хүмүүс ч бусдад үргэр дуурайлал үзүүлж, манлайлагч залуусын үйл ажиллагааг дэмжин оролцжээ. Цусны төвд өрнөсөн өнөөдрийн сайн үйлсийн арга хэмжээнд  100 гаруй хүн хамрагдаж, 30 орчим литр цусны нөөцийг бүрдүүлсэн байна. Тэдний дунд УИХ-ын гишүүн С.Одонтуяа, МУГТ П.Сэрдамба нар хүрэлцэн ирсэн юм.

УИХ-ын гишүүн С.Одонтуяа: Залуус үнэхээр манлайлж чадаж байна…

УИХ-ын гишүүн С.Одонтуяа: Манлайлагч хүн гэдэг аливаа үйлсэд зориглодог, санаачилдаг сэддэг, бусдыг оролцохыг уриалдаг үр дүнг нь үзтэлээ тууштай тэмцэж чаддаг байх хэрэгтэй гэж ойлгодог. Хамгийн гол нь манлайлагч хүн өөрөө бусдыг манлайлж, зөв үзэл бодолтой, зөв үйлдэл гаргадаг, зөв төлөвшилтэй байснаар бусад хүмүүс тийм хүнийг даган дуурайдаг. Тийм болохоор өнөөдрийн энэ сайн үйлсийн аян бол маш чухал сэдэв төдийгүй манлайлагч залуус өөрсдөө санаачлан хэрэгжүүлж буй өндөр ач холбогдолтой үйл явдал юм. Цусны хангамж бол манайд тулгамдсан асуудал. Өнөөдөр нэг залуу сайн дураараа цусаа өгснөөр цаана нь 3 хүний амь аврагдаж байна. Эдгээр залуус үнэхээр манлайлагч байж, манлайлж чадаж байна гэж хэлмээр байна.

МУГТ П.Сэрдамба: Залуус  сайн дураараа донор болохыг уриалж байна…

-Та өдөрлөгийн тухай мэдээллийг хэрхэн хүлээж авсан бэ?

-Манлайлагч залуус сайн үйлсийн арга хэмжээнд хамтран оролцооч гэсэн санал тавихад баяртай хүлээн авсан. Учир нь нэг удаа цус өгөхөд гурван хүний амь аврагддаг. Тийм болохоор олон хүнд амьдрал бэлэглэх энэхүү өдөрлөгт зайлшгүй оролцох ёстой гэж бодсон.

-Та өмнө нь сайн дураараа цусаа өгч байсан уу?

-Би анх 2008 онд цусаа өгч байсан. Тухайн үед нэг удаа өгөхөд гурван хүний алтан амийг авардаг гэдгийг мэддэггүй байсан. Харин өнөөдөр би өөрөө донор болохын ач тусыг мэдэж байгаа учраас залуус  сайн дураараа донор болохыг уриалж байна.

-Та бол манлайлагч залуусын нэг. Манлайлагч залууст хандаж юуг хэлмээр байна?

- Хүн өөртөө зорилго тавьж, үүндээ хүрэхийн тулд мөрөөддөг байх хэрэгтэй. Би тийм л хүсэл тэмүүлэлтэй байсан учраас шантрах үе гарсан ч мөрөөдлөөрөө жигүүр хийж өдий хүрсэн.

“Шинэ ялалт” багийн гишүүн Л.Цэвээнжав: Бид сайн дураараа цусаа хандивлах нь ямар ач тустай үйл болохыг олон нийтэд болон залуустаа сурталчилж, тэднийг уриалж, донор болох тухай мэдээ мэдээллээр хангая гэсэн зорилготой арга хэмжээгээ зохион байгуулсан. Төслийг хэрэгжүүлэхийн тулд бид судалгаа явуулсан. Үүнд Монгол улсын нийт хүн амын 0,8 хувь нь донор болдог, харин дэлхийн стандарт хэмжээ нь 3 хувьд хүрснээр хүн амын цусны хэрэгцээг хангадаг гэсэн дүн гарсан. Тийм болохоор залуус бид энэ асуудалд заавал анхаарал хандуулах хэрэгтэй гэж үзсэн.

Цусны төвийн ЭМНА Д.Дулмаа : Хувь хүн сайн дураараа цусаа хандивлах буюу бэлэглэх гэдэг нь хамгийн буянтай үйл юм. Манай улсын тухайд цусны нөөц харьцангуй бага байдаг тул донорын тоог нэмэгдүүлэх, цусны нөөцийг нэмэгдүүлэхэд онцгой анхаарч ажиллах шаардлагатай байдаг. Зорилтот тв төсөлд оролцож байгаа эдгээр залуус  өөрсдийн санаачлагаар сайн үйлсийн аянг өрнүүлсэн нь бусдад маш том үлгэр дуурайл боллоо.

“Ас Ас” багийн гишүүн Н.Гансүх : Манай төслийн шилдэг залуус болон олны танил хүмүүс, хэвлэл мэдээллийн салбарт ажиллаж байгаа залуустай хамтран сайн дураараа цусаа хандивлаж байна. Энэ удаагийн арга хэмжээг санаачлан хэрэгжүүлж байгаа залуучууддаа талархаж байгаа төдийгүй бид нэг удаагийн арга хэмжээ болгоод өнгөрөхгүй байнгын донор байх болно гэдгээ илэрхийлсэн.

“Хорьт” багийн оролцогч М.Дашдорж: Өнөөдрийн арга хэмжээг зохион байгуулж, санаачилсан “Шинэ ялалт” багийн гишүүддээ бусад оролцогч нарын өмнөөс баярлалаа гэж хэлье. Цусаа хандивлана гэдэг бол бусдад амьдрал бэлэглэж байна гэсэн үг. Манай багийн гишүүд өнөөдрийн өдөрлөгт бүрэн бүрэлдэхүүнээрээ оролцож, цусаа бэлэглэлээ.